উৎকোচৰ অভিযোগঃ আমেৰিকাৰ এক্সচেঞ্জ কমিছনক ৬০ লাখ ডলাৰৰ জৰিমনা দিব লাগিব গৌতম আদানীয়ে

ভাৰতৰ বিখ্যাত উদ্যোগপতি গৌতম আদানীয়ে আমেৰিকাত সন্মুখীন হোৱা আইনী সমস্যা অতি সোনকালেই শেষ হোৱাৰ সম্ভাৱনা আছে। আমেৰিকাৰ ছিকিউৰিটিজ এণ্ড এক্সচেঞ্জ কমিছন চমুকৈ এছ ই চিৰ লগত তেওঁৰ এটা দেৱানী গোচৰ নিষ্পত্তি হোৱাৰ কথা প্ৰকাশ পাইছে। গৌতম আদানী আৰু তেওঁৰ কোম্পানীৰ বিৰুদ্ধে ভাৰতীয় বিষয়াক উৎকোচ দিয়া আৰু আমেৰিকাৰ বিনিয়োগকাৰীসকলক মিছা কথা কোৱাৰ অভিযোগ উঠিছিল। এতিয়া এই গোচৰটো আদালতৰ অনুমোদন সাপেক্ষে নিষ্পত্তি কৰা হ‘ব বুলি বৃহস্পতিবাৰে প্ৰকাশিত আদালতৰ নথিত উল্লেখ কৰা হৈছে। লগতে আমেৰিকাৰ ন্যায় বিভাগেও তেওঁৰ বিৰুদ্ধে থকা আন আন অপৰাধমূলক অভিযোগসমূহ বাতিল কৰাৰ কথা বিবেচনা কৰিছে।

এই গোচৰ নিষ্পত্তি কৰিবলৈ গৌতম আদানীয়ে প্ৰায় ৬০ লাখ ডলাৰ বা ৫২ লাখ ইউৰোৰ দেৱানী জৰিমনা দিবলৈ সন্মত হৈছে। আনহাতে, তেওঁৰ ভতিজা আৰু আদানি গ্ৰীণ এনাৰ্জীৰ আন এজন প্ৰধান বিষয়া সাগৰ আদানীয়ে ১ কোটি ২০ লাখ ডলাৰ দিবলৈ মান্তি হৈছে। মন কৰিবলগীয়া কথা যে এই প্ৰস্তাৱিত নিষ্পত্তিত তেওঁলোকে নিজৰ অপৰাধ স্বীকাৰ কৰাৰ কোনো কথা উল্লেখ নাই। অৰ্থাৎ জৰিমনা ভৰিলেও তেওঁলোকে নিজকে দোষী বুলি মানি লোৱা নাই।

আমেৰিকাৰ প্ৰাক্তন ৰাষ্ট্ৰপতি জো বাইডেনৰ চৰকাৰৰ দিনত ২০২৪ চনত আদানীৰ বিৰুদ্ধে এই গুৰুতৰ অভিযোগসমূহ উত্থাপন হৈছিল। অভিযোগ উঠাৰ পিছতে আদানী গ্ৰুপৰ শ্বেয়াৰৰ মূল্য প্ৰায় ২৩ শতাংশলৈকে হ্ৰাস পাইছিল আৰু কোম্পানীটোৱে যথেষ্ট লোকচানৰ সন্মুখীন হৈছিল। ভাৰতত সৌৰ শক্তিৰ লাভজনক ঠিকা পাবলৈ ভাৰতীয় চৰকাৰী বিষয়াক উৎকোচ দিয়াৰ অভিযোগ উঠিলেও, ভাৰতত কিন্তু তেওঁৰ বিৰুদ্ধে কোনো ধৰণৰ আনুষ্ঠানিক তদন্ত হোৱা নাছিল।

আদানীৰ বিৰুদ্ধে এই অভিযোগসমূহ কিয় বাতিল কৰা হ‘ব ধৰিছে, তাৰো কিছুমান কাৰণ পোহৰলৈ আহিছে। আমেৰিকাৰ বৰ্তমানৰ ৰাষ্ট্ৰপতি ড‘নাল্ড ট্ৰাম্পৰ ব্যক্তিগত অধিবক্তা ৰবাৰ্ট জিউফ্ৰাক আদানীয়ে নিজৰ অধিবক্তা হিচাপে নিযুক্তি দিয়াৰ পিছতে পৰিস্থিতি সলনি হ‘বলৈ ধৰে। যোৱা এপ্ৰিল মাহত হোৱা এখন বৈঠকত জিউফ্ৰাই প্ৰমাণ কৰি দেখুৱাইছিল যে আদানীৰ বিৰুদ্ধে থকা অভিযোগসমূহৰ কোনো সঠিক প্ৰমাণ নাই। লগতে, আদানীয়ে আমেৰিকাত ১০ বিলিয়ন ডলাৰ বিনিয়োগ কৰি ১৫ হাজাৰ নতুন চাকৰি সৃষ্টি কৰাৰ এক প্ৰস্তাৱ দিছিল। ট্ৰাম্পে নিৰ্বাচনত জয়লাভ কৰাৰ পিছতো আদানীয়ে ছ‘চিয়েল মিডিয়াৰ জৰিয়তে আমেৰিকাৰ শক্তি খণ্ডত এই বৃহৎ বিনিয়োগৰ প্ৰতিশ্ৰুতি দোহাৰিছিল। অৱশ্যে আমেৰিকাৰ অধিবক্তাসকলে কৈছে যে এই বিনিয়োগৰ প্ৰস্তাৱে গোচৰ নিষ্পত্তিত কোনো প্ৰভাৱ পেলোৱা নাই।

ইয়াৰ উপৰিও আদানী গ্ৰুপৰ বিৰুদ্ধে আন এটা অভিযোগো উত্থাপন হৈছে। আমেৰিকাৰ নিয়ম ভংগ কৰি ইৰাণৰ গেছ সৰবৰাহ কৰাৰ অভিযোগত আমেৰিকাৰ কোষাগাৰ বিভাগে আদানী কোম্পানীসমূহৰ ওপৰত এক সুকীয়া তদন্ত চলাই আছে। এই তদন্তৰ ফলস্বৰূপে ভৱিষ্যতে কোম্পানীটোক পুনৰ আৰ্থিক জৰিমনা বিহাৰ সম্ভাৱনা আছে বুলিও সংবাদ মাধ্যমত প্ৰকাশ পাইছে।