গিৰিজানন্দ চৌধুৰী বিশ্ববিদ্যালয়ৰ উপাচাৰ্য কন্দৰ্প দাসলৈ সন্মানীয় ‘মেডেল অৱ পুস্কিন’

গিৰিজানন্দ চৌধুৰী বিশ্ববিদ্যালয়ৰ উপাচাৰ্য অধ্যাপক কন্দৰ্প দাসক ৰাছিয়ান ভাষা আৰু সাহিত্যৰ প্ৰতি আগবঢ়োৱা অৱদানৰ স্বীকৃতি স্বৰূপে ২০২৩ বৰ্ষৰ সন্মানীয় ‘মেডেল অৱ পুস্কিন’ বঁটা প্ৰদান কৰা হৈছে।

আন্তৰ্জাতিক ৰাছিয়ান ভাষা আৰু সাহিত্যৰ শিক্ষক সংস্থাই (MAPRYAL) অধ্যাপকগৰাকীক প্ৰদান কৰে এই সন্মানীয় পদক।

শুকুৰবাৰে ৰাছিয়াৰ চেণ্ট পিটাৰবাৰ্গত অনুষ্ঠিত এক অনুষ্ঠানত মেপ্ৰিয়ালৰ সভাপতি তথা প্ৰখ্যাত ৰাছিয়ান সাহিত্যিক লিঅ’ টলষ্টয়ৰ নাতি ভ্লাদিমিৰ ইলিচ টলষ্টয়ৰ পৰা কন্দৰ্প দাসে বঁটা গ্ৰহণ কৰে।

ভাৰতৰ লগতে আৰ্জেণ্টিনা, ইৰাণ, ৰোমানিয়া, চেক গণৰাজ্য, তুৰস্ক, আৰ্মেনিয়া, নাইজেৰিয়া, টিউনিছিয়া, বুলগেৰিয়া আৰু ব্ৰাজিলৰ অন্যান্য বঁটাপ্ৰাপকৰ লগতে তেওঁ গ্ৰহণ কৰে এই সন্মানীয় বঁটা।

জৱাহৰলাল নেহৰু বিশ্ববিদ্যালয় (JNU) আৰু মস্কো ষ্টেট ইউনিভাৰ্চিটিৰ প্ৰাক্তন ছাত্ৰ অধ্যাপক কন্দৰ্প দাসে ইয়াৰ পূৰ্বে ২০১৫ চনত ফুলব্ৰাইট নেহৰু ফেল’শ্বিপ লাভ কৰিছিল।

এই আন্ত:ৰাষ্ট্ৰীয় কৃতিত্ব তথা সন্মান কঢ়িয়াই অনাৰ বাবে গিৰিজানন্দ চৌধুৰী বিশ্ববিদ্যালয়ে অভিনন্দন জ্ঞাপন কৰে উপাচাৰ্যগৰাকীক।

উল্লেখ্য যে, ৰাছিয়ান ফেডাৰেচনে কলা, সংস্কৃতি, শিক্ষা, মানৱীয় আৰু সাহিত্যৰ ক্ষেত্ৰত আগবঢ়োৱা অৱদানৰ বাবে আন্তৰ্জাতিক পৰ্যায়ত প্ৰদান কৰে ‘মেডেল অৱ পুস্কিন’ সন্মান।

প্ৰখ্যাত ৰাছিয়ান সাহিত্যিক আলেকজেণ্ডাৰ পুস্কিনৰ সন্মানত এই বঁটাৰ নামাকৰণ কৰা হৈছে।