আয়াতুল্লাহ আলী খামেনেইৰ হত্যাত লৈ বিশ্ব বিয়পা প্ৰতিক্ৰিয়া

ইৰাণৰ দীৰ্ঘসময়ৰ শাসক আয়াতুল্লাহ আলী খামেনেইৰ হত্যাই সমগ্ৰ বিশ্ব জোকাৰি গৈছে। এই খবৰৰ পাছতে বিভিন্ন দেশৰ চৰকাৰ আৰু আন্তঃৰাষ্ট্ৰীয় সংস্থাসমূহে মধ্যপ্ৰাচ্যত হ’ব পৰা সাম্ভাব্য অস্থিৰতাক লৈ গভীৰ উদ্বেগ প্ৰকাশ কৰিছে। বহু ৰাষ্ট্ৰপ্ৰধানে এই জটিল সময়ত সকলোকে সংযমী হবলৈ আহ্বান জনাইছে।

ৰাছিয়া আৰু চীনে খামেনেইৰ হত্যাক কঠোৰ ভাষাৰে সমালোচনা কৰিছে। ৰাছিয়াৰ ৰাষ্ট্ৰপতি ভ্লাদিমিৰ পুটিনে ইয়াক আন্তঃৰাষ্ট্ৰীয় আইনৰ এক গুৰুতৰ উলংঘন বুলি অভিহিত কৰি খামেনেইৰ প্ৰতি সমবেদনা জনাইছে। একেদৰে চীনেও এই আক্ৰমণক গ্ৰহণযোগ্য নহয় বুলি কৈছে আৰু ইৰাণত সামৰিক অভিযান বন্ধ কৰিবলৈ দাবী জনাইছে। আনহাতে ইউৰোপীয় দেশসমূহে অতি সাৱধানতাৰে নিজৰ প্ৰতিক্ৰিয়া প্ৰকাশ কৰিছে। ইউৰোপীয় ইউনিয়নে এই সময়ছোৱাক ইৰাণৰ ইতিহাসৰ এক নিৰ্ণায়ক মোৰ (turning point) বুলি উল্লেখ কৰাৰ লগতে শান্তি তথা আলোচনাৰ ওপৰত গুৰুত্ব দিছে। ব্ৰিটেইন আৰু ফ্ৰান্সেও মধ্যপ্ৰাচ্যত নিজৰ সুৰক্ষা ব্যৱস্থা কটকটীয়া কৰি তুলিছে আৰু অঞ্চলটোত যাতে সংঘাত বৃদ্ধি নাপায় তাৰ বাবে কূটনৈতিক প্ৰচেষ্টা অব্যাহত ৰাখিছে।

মধ্যপ্ৰাচ্যৰ দেশসমূহৰ মাজত এই হত্যাক লৈ মিশ্ৰিত প্ৰতিক্ৰিয়া দেখা গৈছে। ইৰাকে ৰাষ্ট্ৰীয় শোক ঘোষণা কৰাৰ বিপৰীতে কেইবাখনো চুবুৰীয়া দেশে ইৰাণৰ আক্ৰমণৰ আশংকাত নিজৰ আকাশমাৰ্গ আৰু সীমান্তৰ সুৰক্ষা বৃদ্ধি কৰিছে। হামাছৰ দৰে সংগঠনসমূহে খামেনেইক তেওঁলোকৰ এজন ডাঙৰ সমৰ্থক বুলি অভিহিত কৰি গভীৰ শোক প্ৰকাশ কৰিছে। লেটিন আমেৰিকা আৰু বিশ্বৰ অন্যান্য প্ৰান্তৰ দেশসমূহৰ মাজতো এই ঘটনাক লৈ মতভেদ দেখা পোৱা গৈছে।

তদুপৰি সমগ্ৰ পশ্চিম এছিয়াতে তীব্ৰ উত্তেজনাৰ পৰিপ্ৰেক্ষিতত ভাৰতে সকলোকে সংযমী হ’বলৈ আৰু আলোচনাৰ মাধ্যমেৰে সমস্যা সমাধান কৰিবলৈ আহ্বান জনাইছে। এক চৰকাৰী বিবৃতিযোগে বৈদেশিক পৰিক্ৰমা মন্ত্ৰালয়ে মধ্যপ্ৰাচ্যত বৃদ্ধি পোৱা সংঘাতক লৈ গভীৰ উদ্বেগ প্ৰকাশ কৰিছে। ভাৰতে অবিলম্বে যুদ্ধ শেষ কৰিবলৈ আৰু আন্তৰ্জাতিক আইনক সন্মান জনাবলৈ আহ্বান জনাইছে। উল্লেখযোগ্য যে, আমেৰিকা আৰু ইজৰাইলৰ সামৰিক অভিযানক নতুন দিল্লীয়ে এই পৰ্যন্ত পোনপটীয়াকৈ সমৰ্থন বা গৰিহণা দিয়াৰ পৰা বিৰত আছে। ভাৰতীয় বিষয়াসকলে অঞ্চলটোত স্থিৰতা বজাই ৰখাৰ ওপৰত বিশেষ গুৰুত্ব আৰোপ কৰিছে। পশ্চিম এছিয়াত চলি থকা এই অস্থিৰতাই খাৰুৱা তেলৰ দামৰ ওপৰত বিৰূপ প্ৰভাৱ পেলাব পাৰে বুলি আশংকা কৰা হৈছে। ইয়াৰ উপৰি উপসাগৰীয় দেশসমূহত কৰ্মৰত লাখ লাখ ভাৰতীয় লোকৰ সুৰক্ষাৰ বিষয়টো এতিয়া চৰকাৰৰ বাবে আটাইতকেই ডাঙৰ চিন্তাৰ কাৰণ হৈ পৰিছে। কেন্দ্ৰীয় চৰকাৰৰ সূত্ৰই জনোৱা মতে ইৰাণ আৰু ইয়াৰ চুবুৰীয়া দেশসমূহত থকা ভাৰতীয় নাগৰিকসকলৰ নিৰাপত্তাক সৰ্বোচ্চ অগ্ৰাধিকাৰ দিয়া হৈছে। ইৰাণত থকা ভাৰতীয় দূতাবাসে ইতিমধ্যে জৰুৰীকালীন হেল্পলাইন নম্বৰ মুকলি কৰিছে আৰু ভাৰতীয়সকলক অতি সাৱধানে থাকিবলৈ পৰামৰ্শ দিছে।

কূটনৈতিক দিশৰ পৰা চাবলৈ গলে ভাৰত বৰ্তমান এক কঠিন প্ৰত্যাহ্বানৰ মুখামুখি হৈছে। ভাৰতে পৰম্পৰাগতভাৱে ইৰাণৰ সৈতে বন্ধুত্ত্বপূৰ্ণ সম্পৰ্ক ৰখাৰ লগতে পশ্চিমীয়া দেশসমূহৰ সৈতেও সুসম্পৰ্ক বজাই ৰাখিছে। ইফালে ইৰাণৰ চাবাহাৰ বন্দৰ প্ৰকল্পত ভাৰতৰ বৃহৎ স্বাৰ্থ জড়িত হৈ আছে। আনহাতে আমেৰিকা আৰু ইজৰাইলৰ সৈতে ভাৰতৰ ক্ৰমান্বয়ে বৃদ্ধি পোৱা সুৰক্ষা আৰু অৰ্থনৈতিক অংশীদাৰিত্বৰ বাবে এই স্পৰ্শকাতৰ বিষয়টোত ভাৰতে অতি জুখি-মাখি নিজৰ মত প্ৰকাশ কৰিবলৈ বাধ্য হৈছে।

ইপিনে ৰাষ্ট্ৰসংঘই সকলো পক্ষকে শান্তি বজাই ৰাখিবলৈ বাৰে বাৰে অনুৰোধ জনাইছে। আন্তঃৰাষ্ট্ৰীয় বিশেষজ্ঞসকলৰ মতে খামেনেইৰ হত্যাই মধ্যপ্ৰাচ্যৰ ৰাজনৈতিক মানচিত্ৰ সলনি কৰি দিব পাৰে। ইৰাণে ইতিমধ্যে প্ৰতিশোধ লোৱাৰ হুংকাৰ দিছে আৰু এই ঘটনাৰ বাবে অনাগত দিনত অঞ্চলটোত অস্থিৰতা বৃদ্ধি হোৱাৰ সম্ভাৱনা দেখা দিছে।