সাত বছৰীয়া কন্যাৰ সন্মুখতে গোৱাত স্বামীৰ দুই আবিয়ৈ পেহীয়েকক হত্যা কৰিলে দুগৰাকী মহিলাই
সাত বছৰীয়া নিজ কন্যাৰ সন্মুখতে এগৰাকী মহিলাই সহযোগীৰ সৈতে মিলি স্বামীৰ দুই আবিয়ৈ পেহীয়েকক চোকা অস্ত্ৰেৰে হত্যা কৰাৰ এক লোমহৰ্ষক ঘটনাই চাঞ্চল্যৰ সৃ্ষ্টি কৰিছে।
ঘটনাটো সংঘটিত হৈছে দক্ষিণ গোৱাৰ অঞ্জুনা আৰক্ষী থানাৰ অন্তৰ্গত চিয়’লিম নামৰ গাঁৱত।
আৰক্ষী সূত্ৰই প্ৰকাশ কৰা অনুসৰি যোৱা দেওবাৰে সন্ধিয়া জুলিঅ’ লুবু(৩২)ৰ পত্নী ৰবীনা লুবু(২৮) তেওঁৰ সহযোগী শোভন ৰাজ্যবল্লী(২৮)এ জুলিঅ’ৰ দুই আবিয়ৈ পেহীয়েক ক্ৰমে ক্লেমেন্টিনা লুবু(৬৪) আৰু ভাৰা লুবু(৬২)ক চোকা অস্ত্ৰেৰে সানি খুচি হত্যা কৰে।
আৰক্ষীয়ে প্ৰকাশ কৰা অনুসৰি জুলিঅ’-এ দুই আবিয়ৈ পেহীয়েকক লৈ নিজৰ পৰিয়ালটোৰ সৈতে একেখন গাঁৱতে পিতৃ-মাতৃৰ পৰা পৃথকে বাস কৰিছিল।
এই লৈ জুলিঅ’ৰ পত্নী ৰবীনা আৰু দুই আবিয়ৈ পেহীয়েকৰ সৈতে প্ৰায়ে কাজিয়া সূত্ৰপাত হৈ অহাৰ লগতে ৰবীনাক দুই আবিয়ৈ পেহীয়েকে অত্যাচাৰ কৰি অহা বুলি অভিযোগ উত্থাপিত হৈছে। সেয়ে দুয়োকে হত্যা কৰাৰ পৰিকল্পনা কৰা বুলি আৰক্ষীৰ আগত প্ৰকাশ কৰিছে অভিযুক্তই।
“ৰবীনাই শোভন(হত্যাৰ কাণ্ডৰ সৈতে জড়িত)ক স্বামীৰ দুই আবিয়ৈ পেহীয়েকৰ সৈতে দীৰ্ঘদিনৰ পৰা সম্পৰ্ক ভাল নহয় বুলি কৈছিল। আৰু দুয়োৱে চোকা অস্ত্ৰেৰে হত্যাকাণ্ডটো সংঘটিত কৰে।” অঞ্জুনা আৰক্ষী থানাৰ পৰিদৰ্শক সুৰজ গাৱাছে সাংবাদিকক কয়।
জুলু আৰু ৰবীনাৰ এগৰাকী সাত বছৰীয়া কন্যা সন্তান আৰু এটি এবছৰীয়া পুত্ৰ সন্তান আছে। ৰবীনা আৰু শোভনে স্বামী ঘৰত নথকা অৱস্থাত সাত বছৰীয়া নিজ কন্যাৰ চকুৰ আগতে উক্ত হত্যাকাণ্ডটো সংঘটিত কৰে।
ঘৰলৈ অহাৰ পিছত সাত বছৰীয়া কন্যাই মাতৃয়ে হত্যাকাণ্ড সংঘটিত কৰাৰ কথা পিতৃক অৱগত কৰে আৰু পিতৃয়ে লগে লগে আৰক্ষীক খবৰ দিয়ে।
আৰক্ষীয়ে ৰবীনা আৰু শোভন দুয়োকে গ্ৰেপ্তাৰ কৰি তদন্ত প্ৰক্ৰিয়া আৰম্ভ কৰিছে।