গোলাঘাট নিৰ্বাচন জিলাৰ শুভংকৰ তীখৰ আৰু চুটিবাইসহ ভোটাৰ চেল্ফি জ’ন মুকলি
গোলাঘাট নিৰ্বাচন জিলাৰ ভোটদাতাসকলক ভোটদানৰ প্ৰতি সজাগ কৰাৰ উদ্দেশ্যে “ভোটদাতাৰ প্ৰণালীবদ্ধ শিক্ষা আৰু নিৰ্বাচনী অংশগ্ৰহন” চমুকৈ SVEEP ৰ অধীনত বৃহস্পতিবাৰে দুটা নিৰ্বাচনী শুভংকৰ আৰু ভোটাৰ চেল্ফি জ’ন মুকলি কৰা হৈছে।
জিলা উপায়ুক্ত তথা জিলা নিৰ্বাচন বিষয়া বিভাষ চন্দ্ৰ মোদীয়ে শুভংকৰ দুটাৰ লগতে চেল্ফি জ’নটো মুকলি কৰে।
তেওঁ প্ৰতিজন লোককে ভোট দিবলৈ আহ্বান জনাই কয় যে ভোটদান এজন নাগৰিকৰ দায়বদ্ধতা আৰু যিকোনো পৰিস্থিতিতে সকলোৱে নিজৰ দায়িত্ব আৰু কৰ্তব্যৰ পৰিচয় দিয়া উচিত।
এইবাৰ সকলোৰে ভোটগ্ৰহন সুনিশ্চিত কৰাৰ উদ্দেশ্যে অত্যাৱশ্যকীয় সেৱাৰ সৈতে জড়িত লোকসকলৰ বাবে পোষ্টেল বেলটৰো ব্যৱস্থা কৰা হৈছে বুলি তেওঁ উল্লেখ কৰে।
উল্লেখযোগ্য যে লক্ষ্মীনাথ বেজবৰুৱাৰ বুঢ়ী আইৰ সাধুৰ “তীখৰ আৰু চুটি বাই” সাধুটোৰ আধাৰত দল হৰিণ আৰু পখিলাৰ আকৃতিৰে শুভংকৰ দুটা প্ৰস্তুত কৰি উলিওৱা হৈছে।
২০১৬ চনৰ এটা সমীক্ষা মতে নামবৰ দৈগ্ৰোঙ অভয়াৰণ্যত ২২৪ টা প্ৰজাতিৰ পখিলা আছে। আনহাতে, দল হৰিণ ভাৰতৰ কেইখনমান বনাঞ্চলতহে পোৱা যায় । তাৰ ভিতৰত অসমৰ কাজিৰঙাত ১০০০ৰো অধিক দল হৰিণ আছে । মানাহ ৰাষ্ট্ৰীয় উদ্যানতো দল হৰিণ পোৱা যায়।
ইতিমধ্যে পাকিস্তান আৰু বাংলাদেশত দল হৰিণ বিলুপ্ত হৈছে। IUCN এ ইতিমধ্যে ইয়াক threatened শ্ৰেণীত অন্তৰ্ভুক্ত কৰিছে। ১২টা শিঙেৰে ধুনীয়া প্ৰাণীবিধ প্ৰায়ে চোৰাং চিকাৰীৰ বলি হয়।
দল হৰিণৰ সংৰক্ষণ আৰু পখিলাৰ অধিক গৱেষণাৰ দিশটোৰ প্ৰতি লক্ষ্য ৰাখি এই দুবিধ প্ৰাণীক নিৰ্বাচনী শুভংকৰ হিচাপে গ্ৰহণ কৰা হৈছে।
নতুন আমোলাপট্টিত থকা বিশাল মেগামাৰ্টৰ সন্মুখত চেল্ফি জ’নটো স্থাপন কৰাৰ লগতে শুভংকৰ দুটা ৰখা হ’ব।
অনুষ্ঠানত জিলা উন্নয়ন আয়ুক্ত অৰ্পা বাগলাৰী আৰু অতিৰিক্ত উপায়ুক্ত মুন গগৈ আৰু পল্লৱী গগৈৰ লগতে ভালেমান বিষয়া-কৰ্মচাৰী উপস্থিত আছিল।