নগাঁও-কাৰ্বিআংলঙৰ সীমান্তৱৰ্ত্তী ৰাইজৰ বাবে সুখবৰ : হাতীৰ খাদ্যৰ বাবে বনভূমিৰ মুকলি ঠাইত ঘাঁহ ৰোপণৰ নিৰ্দেশ মুখ্যমন্ত্ৰীৰ

নগাঁও-কাৰ্বিআংলং জিলাৰ সীমান্তৱৰ্ত্তী অঞ্চলত সুদীৰ্ঘ দিন ধৰি বন্যহস্তীৰ উপদ্ৰৱত বিনিদ্ৰ ৰজনী পাৰ কৰিবলৈ বাধ্য হোৱা ভুক্তভোগী লোকসকলৰ বাবে এক আশাৰ বতৰা কঢ়িয়াই আনিছে বন বিভাগে।

বন বিভাগৰ এক বিশেষ সূত্ৰৰ খবৰৰ মতে মুখ্যমন্ত্ৰী সৰ্ৱানন্দ সোণোৱালৰ নিৰ্দেশ অনুসৰি নগাঁও-কাৰ্বিআংলং সীমান্তৱৰ্ত্তী চোৰাং সংৰক্ষিত বনাঞ্চলকে ধৰি বন্যহস্তীয়ে বিচৰণ কৰা পাহাৰীয়া বনাঞ্চলসমূহৰ মুকলি ঠাইবোৰত এইবছৰ বন্যহস্তীৰ খাদ্যক বাবে ৰোপণ কৰা হ’ব বিভিন্ন প্ৰজাতিৰ ঘাঁহ জাতীয় উদ্ভিদ।

বনৰীয়া হাতীয়ে যাতে কৃষকৰ পথাৰত ধান পকাৰ সময়ত খাদ্যৰ সন্ধানত ভৈয়ামলৈ নামি নাহি পাহাৰতে পৰ্যাপ্ত আহাৰ গ্ৰহণ কৰিব পাৰে তাৰ বাবে এই ব্যৱস্থা লোৱা হ’ব বুলি জানিব পৰা গৈছে।

ইতিমধ্যে কেম্পা আঁচনিৰ জৰিয়তে এক বৃহৎ পৰিকল্পনাৰে বন বিভাগ এই কামত যথেষ্ট আগবাঢ়িছে বুলি সংবাদ মাধ্যমক জানিবলৈ দিয়ে নগাঁও জিলাৰ বন সংমণ্ডল বিষয়া গৰাকীয়ে।

নগাঁও জিলাৰ চাপানালাত অনুষ্ঠিত ৬৬ সংখ্যক বন্যপ্ৰাণী সপ্তাহৰ কাৰ্যসূচীত শালনা আঞ্চলিক বন বিষয়াগৰাকীৰ সৈতে উপস্থিত থাকি নগাঁও জিলা বন সংমণ্ডল বিষয়াগৰাকীয়ে সমগ্ৰ সপ্তাহটো কেৱল বন্যপ্ৰাণীৰ সুৰক্ষাৰ ক্ষেত্ৰত জিলাখনৰ বিভিন্ন অঞ্চলৰ ৰাইজৰ মাজত সজাগতা সৃষ্টি কৰাৰ প্ৰয়াস কৰাৰ কথাও সদৰি কৰে।

উল্লেখযোগ্য যে, যোৱা বছৰ ভৈয়ামৰ পথাৰলৈ ধান পকাৰ সময়ত বন্যহস্তী নামি নাহিবলৈ ৰাজ্যৰ ভিতৰতে পোন প্ৰথমবাৰৰ বাবে গুৱাহাটীৰ প্ৰদীপ ভূঞাৰ পৃষ্ঠপোষকতা তথা চাপানালাৰ প্ৰকৃতিপ্ৰেমী যুৱক বিনোদ দুলু বৰাৰ নেতৃত্বত নগাঁও-কাৰ্বিআংলং সীমান্তৱৰ্ত্তী ৰংহাং হাতীখলি গাঁৱৰ ৰাইজে “হাতীবন্ধু” নামৰ এটি স্বেচ্ছাসেৱী সংস্থাৰ সহযোগত ২০০ বিঘা ভূমিত বনৰীয়া হাতীয়ে খাবৰ বাবে ধান খেতি কৰি লাভ কৰিবলৈ সক্ষম হৈছিল এক বিশেষ সফলতা।

শেহতীয়াকৈ মুখ্যমন্ত্ৰী সৰ্ৱানন্দ সোনোৱালৰ পোনপটীয়া নিৰ্দেশ অনুযায়ী বন বিভাগেও নিজাববীয়াকৈ এই বছৰ দুলু বৰাৰ আৰ্হিৰে অনুৰূপ ধৰণেৰে বনৰীয়া হাতীৰ বাবে বনভূমিত ঘাঁহ ৰোপণ কৰাৰ আশাব্যঞ্জক খবৰ লাভ কৰি উৎফুল্লিত হৈ পৰিছে খোদ প্ৰকৃতিপ্ৰেমী যুৱক দুলু বৰাও।

ইফালে দুলু বৰাৰ নেতৃত্বত ৰংহাং হাতীখলি গাঁৱৰ ৰাইজে হাতীবন্ধুৰ জৰিয়তে পুনৰ এই বছৰো ২০০ বিঘাৰ পৰিৱৰ্তে ৬০০ বিঘাকৈ ভূমিত ধান খেতিৰ লগতে পাহাৰীয়া অঞ্চলত হাতীৰ বাবে খাদ্য হিচাপে বিভিন্ন প্ৰজাতিৰ ঘাঁহ গছ ৰোপণ কৰিব বুলি জানিবলৈ দিয়ে।