পৃথক বড়োলেণ্ডৰ দাবীত কোকৰাঝাৰত বিশাল গণ সমাৱেশ
অতি শীঘ্ৰে পৃথক বড়োলেণ্ড গঠন, বড়োলেণ্ডৰ বাহিৰত বসবাস কৰা বড়োসকলৰ ৰাজনৈতিক আৰু অৰ্থনৈতিক অধিকাৰ সুনিশ্চিত কৰা তথা কাৰ্বি আংলঙত বসবাস কৰা বড়োসকলক পাৰ্বত্য জনজাতিৰ মৰ্যাদা প্ৰদানৰ দাবীত এবছু, এন ডি এফ বি(প্ৰ) আৰু পি জে এ চি বি এমৰ উদ্যোগত আজি কোকৰাঝাৰত এক বিশাল গণ সমাৱেশ অনুষ্ঠিত হয়।
কোকৰাঝাৰৰ দক্ষিণ খাৰগাঁৱৰ নৱনিৰ্মিত উৰণীয়া সেতুৰ কাষত অনুষ্ঠিত এই গণ সমাৱেশত ৰাজ্যসভাৰ প্ৰাক্তন সাংসদ উৰ্খাও গৌৰা ব্ৰহ্মই কেন্দ্ৰীয় চৰকাৰক বড়োলেণ্ডৰ সমস্যাৰ স্থায়ী সমাধান কৰিবলৈ আহ্বান জনাইছে।
তেওঁ লগতে কয়, ‘পৃথক বড়োলেণ্ড ৰাজ্য গঠনৰ দাবী নতুন নহয়। বড়োসকলে বছৰ বছৰ ধৰি পৃথক বড়োলেণ্ডৰ দাবী জনাই আহিছে। বিজেপিয়ে আমাক প্ৰতিশ্ৰুতি দিছিল কিন্তু এতিয়া সেই প্ৰতিশ্ৰুতি তেওঁলোকে পাহৰি গৈছে’।
ইয়াৰ উপৰি গণ সমাৱেশত পি জে এ চি বি এমৰ মুখ্য আহ্বায়ক ৰাকেশ বড়োৱে যেতিয়ালৈকে বিজেপি নেতৃত্বাধীন কেন্দ্ৰীয় চৰকাৰে পৃথক ৰাজ্যৰ দাবী মানি নলয় তেতিয়ালৈকে এই আন্দোলন অব্যাহত থাকিব বুলি মন্তব্য কৰে।
গণ সমাৱেশত এবছুৰ সাধাৰণ সম্পাদক লৰেন্স ইছলাৰী, য়ু পি পি এলৰ সভাপতি উৰ্খাও গৌৰা ব্ৰহ্ম, পি জে এ চি বি এমৰ মুখ্য আহ্বায়ক ৰাকেশ বড়ো, এন ডি এফ বি (প্ৰ ) আৰ্মী চীফ বি চুদেমকে ধৰি বি টি এ ডিৰ চাৰিওখন জিলাৰ পৰা অহা সহস্ৰাধিক লোকে অংশ লৈ পৃথক বড়োলেণ্ডৰ দাবী উত্থাপন কৰে।