গুজৰাটত আপ নেতাক ভয়াৱহ আক্ৰমণ: বিজেপি জড়িত থকাৰ অভিযোগ

আগন্তুক গুজৰাট বিধানসভা নিৰ্বাচনৰ বাবে ৰাজ্যখনত আম আদমী পাৰ্টীয়ে ক্ৰমে নিজৰ স্থিতি সবল কৰি তুলিছে। জোৰদাৰ প্ৰচাৰেৰে দলটোৱে শাসকীয় বিজেপি দলৰ সন্মুখত তীব্ৰ প্ৰত্যাহ্বানৰ সৃষ্টি কৰিছে। এনে ৰাজনৈতিক কুচ-কাৱাজৰ মাজতে মঙলবাৰে ৰাজ্যখনত আক্ৰমণৰ সন্মুখীন হৈছে দলটোৰ এগৰাকী শীৰ্ষ নেতা।

চুৰাটৰ চিমাণ্ডা নাকাৰ ওচৰত আম আদমী পাৰ্টিৰ (আপ) নেতা মনোজ সোৰাথিয়াক কালি আক্ৰমণ কৰা হয়। ৰাজ্যিক দলৰ সাধাৰণ সম্পাদক পদত থকা নেতাগৰাকী গণেশ চতুৰ্থী উদযাপনৰ প্ৰস্তুতিৰ বুজ ল’বলৈ যোৱাৰ সময়ত আক্ৰমণৰ বলি হয়।

আপৰ মতে চোৰাথিয়া চুৰাটৰ দলীয় কাৰ্যালয়ৰ ওচৰত থকাৰ সময়তে দুৰ্বৃত্তই নেতাজনক আক্ৰমণ কৰি গুৰুতৰভাৱে আহত কৰে। দলটোৱে এই আক্ৰমণৰ আঁৰত বিজেপি জড়িত আছে বুলি অভিযোগ কৰিছে।

গুজৰাটত আপৰ বৰ্ধিত জনপ্ৰিয়তাত ভীতিগ্ৰস্ত হৈয়ে শাসকীয় বিজেপিয়ে এই আক্ৰমণ সংঘটিত কৰিছে বুলি গুৰুতৰ অভিযোগ উত্থাপন কৰিছে আপে।

আপৰ মুখ্য মিডিয়া সমন্বয়ক বিকাশ যোগীয়ে এটা টুইটযোগে আক্ৰমণত আহত চোৰাথিয়াৰ ফটো শ্বেয়াৰ কৰি বিজেপিৰ গুণ্ডাই মনোজ চোৰাথিয়াৰ জীৱনলৈ এই আক্ৰমণৰ জৰিয়তে ভাবুকি কঢ়িয়াই আনিছে বুলি অভিযোগ কৰিছিল।

টুইটটোত সংযোগ কৰা ফটোবোৰত আপ নেতাগৰাকীৰ মূৰৰ পৰা ৰক্তক্ষৰণ হৈ থকা দেখিবলৈ পোৱা গৈছিল। বিকাশ যোগীৰ এই টুইটটো ৰিটুইট কৰি আপ মুৰব্বী অৰবিন্দ কেজৰিৱালে গুজৰাটৰ মুখ্যমন্ত্ৰী ভূপেন্দ্ৰ পেটেলৰ আক্ৰমণত জড়িত অভিযুক্তক শাস্তি দিবলৈ আহ্বান জনায়।

টুইটটোত কেজৰিৱালে বিজেপিক আক্ৰমণ কৰি এনেদৰে বিৰোধী দলৰ নেতাক আক্ৰমণৰ লক্ষ্য কৰাটো সঠিক নহয় বুলি সকীয়াই দিয়ে। কেজৰিৱালে কয়, “নিৰ্বাচনৰ সময়ত জয় আৰু পৰাজয় সচৰাচৰ হয়, কিন্তু বিৰোধীক এনেদৰে ধ্বংস কৰিবলৈ চেষ্টা কৰাটো গুজৰাটৰ সংস্কৃতিৰ বিৰুদ্ধে আৰু জনসাধাৰণে এয়া ভাল নাপায়।”

উল্লেখ্যে যে গুজৰাটৰ আগন্তুক নিৰ্বাচনৰ বাবে জোৰদাৰ প্ৰস্তুতি চলোৱা আপে আজি গণেশ চতুৰ্থীত ৰাজ্যখনৰ ঘৰে ঘৰে ৰাষ্ট্ৰীয় আহ্বায়ক অৰবিন্দ কেজৰিৱালে প্ৰতিশ্ৰুতি দিয়া গেৰাণ্টিৰ বিষয়ে সজাগতা প্ৰচাৰ কৰাৰ কাৰ্যসূচী হাতত লৈছে।

গুজৰাট ভ্ৰমণৰ সময়ত কেজৰিৱালে দিল্লীৰ শিক্ষা আৰ্হিৰ ওপৰত আলোকপাত কৰি একে মানদণ্ডৰ বিনামূলীয়া শিক্ষা আৰু স্বাস্থ্যসেৱা, বিনামূলীয়া বিদ্যুৎ, নিবনুৱা ভাট্টা, ১০ লাখ চাকৰিআৰু মহিলাসকলৰ বাবে ১,০০০ টকাৰ ভাট্টা “গেৰাণ্টি” দিয়াৰ প্ৰতিশ্ৰুতি দিছিল।

গেৰাণ্টি পঞ্জীয়ন অভিযানৰ অংশ হিচাপে আপ কৰ্মীসকলে ভোটাৰ, গাওঁ, ৱাৰ্ড নম্বৰ, মোবাইল ফোন নম্বৰ, বিধানসভা খণ্ড, আৰু অন্যান্য বিৱৰণৰ নাম পঞ্জীয়ন কৰিব বুলি ইতিমধ্যে ঘোষণা কৰিছে।

দলৰ নেতাসকলৰ মতে, ক্ষমতালৈ অহাৰ পিছত আপে কাৰ্যকৰী কৰিব লগা প্ৰতিশ্ৰুতিৰ বিষয়ে উল্লেখ কৰি ৰাজ্যখনৰ জনসাধাৰণক গেৰাণ্টি কাৰ্ড প্ৰদান কৰা হ’ব। কেজৰিৱালে ২ ছেপ্টেম্বৰৰ পৰা ৰাজ্যখনত মাহজোৰা প্ৰচাৰত যোগদান কৰাৰ সম্ভাৱনা আছে বুলি ইতিমধ্যে দলীয় সূত্ৰই প্ৰকাশ কৰিছে।