তিনিচুকীয়াত আলফাৰ বিৰুদ্ধে সেনাৰ অভিযান : এজন আহত

উজনি অসমৰ তিনিচুকীয়াত আলফা স্বাধীনৰ বিৰুদ্ধে নিৰাপত্তা বাহিনীয়ে পুৱাৰ ভাগত চলোৱা অভিযানত সেনা বাহিনী আৰু উগ্ৰপন্থীৰ মাজত সংঘৰ্ষৰ সৃষ্টি হয়। এই সংঘৰ্ষত এজন লোক আহত হোৱাৰ খবৰ পোৱা গৈছে। আহত ব্যক্তিগৰাকীৰ নাম অমিত মুখীয়া।

খবৰ অনুসৰি আহত ব্যক্তিজনক চিকিৎসালয়ত ভৰ্তি কৰা হৈছে যদিও উগ্ৰপন্থীৰ সৈতে তেওঁৰ সম্পৰ্ক আছিল নে তেওঁ এজন সাধাৰণ নাগৰিক আছিল সেয়া এতিয়াও স্পষ্ট হোৱা নাই।

তিনিচুকীয়াৰ পেংগেৰী অঞ্চলত সন্দেহযুক্ত আলফা কেডাৰ আৰু নিৰাপত্তাৰক্ষীৰ মাজত এক এনকাউণ্টাৰ সংঘটিত হয়। পৰিস্থিতি নিয়ন্ত্ৰণত ৰাখিবলৈ প্ৰশাসনে পেংগেৰী-ডিগবৈ পথ অৱৰোধ কৰিছে।

সূত্ৰ অনুসৰি আৰক্ষী আৰু নিৰাপত্তা বাহিনীৰ হাতত অঞ্চলটোত আশ্ৰয় লোৱা সন্দেহযুক্ত উগ্ৰপন্থীৰ এটা দলৰ তথ্য আছিল। সেয়ে অঞ্চলটোত অভিযান চলাবৰ বাবে প্ৰৱেশ কৰিছিল সেনা-আৰক্ষী।

অৱশ্যে আহত যুৱকজন সাধাৰণ নাগৰিক বুলি জানিব পৰা গৈছে।