নতুন সিদ্ধান্ত।। এ টি এম নহ’লেও তেল পোৱাৰ ব্যৱস্থা গুৱাহাটীৰ পে’ট্ৰল পাম্পত

এ টি এমৰ জৰিয়তে লেনদেনতহে গুৱাহাটীৰ পে’ট্ৰল পাম্পত তেল দিয়াৰ সিদ্ধান্ত বাতিল হৈছে।

জিলা উপায়ুক্ত আৰু তেল ডিপো মালিক সন্থাৰ মাজত হোৱা বৈঠকৰ পাছতে বৃহস্পতিবাৰে গ্ৰহণ কৰা হৈছে এই সিদ্ধান্ত।

এতিয়াৰ পৰা নগদ ধন আৰু কাৰ্ড দুয়োটা মাধ্যমেৰে তেল ভৰাব পাৰিব গ্ৰাহকসকলে।

নিৰ্বাচনৰ মাজত অসম তথা উত্তৰ-পূবত হিচাপহীন অবৈধ নগদ ধন সৰবৰাহৰ প্ৰতি লক্ষ্য ৰাখি মালিক সন্থাই এই সিদ্ধান্ত লৈছিল। কিন্তু ৰাইজৰ মাজত সৃষ্টি হোৱা হাহাকাৰলৈ লক্ষ্য ৰাখি সিদ্ধান্তটো বাতিল কৰা হৈছে বুলি জনাইছে গুৱাহাটী পে’ট্ৰল পাম্প মালিক সন্থাই।

“আমি আজি জিলা উপায়ুক্তৰ সৈতে আলোচনাত মিলিত হ’লো। তেওঁ আমাক দুটা ৱটচএপ নম্বৰ দিছে। সেই নম্বৰ দুটাত বেংকলৈ ধন নিয়াৰ পূৰ্বে মেনেজাৰৰ পৰিচয় পত্ৰ আৰু বেংকৰ টকা জমা কৰা ৰচিদ ফটো মাৰি প্ৰেৰণ কৰিব লাগিব।” নৰ্থ ইষ্ট নাও-ক জনায় মালিক সন্থাৰ সভাপতি ৰাজীৱ গোস্বামীয়ে।

উল্লেখযোগ্য যে যোৱা ১৭ এপ্ৰিলত আৰক্ষী আৰু নিৰ্বাচনী ফ্লাইং স্কুৱাডৰ দলে নুনমাটিৰ চূণচালিত অমৃত চন্দ্ৰ ডেকা নামৰ এজন লোকৰ পৰা ২৫.১১ লাখ টকা জব্দ কৰিছিল।

আৰক্ষীয়ে জব্দ কৰা ধনখিনি আছিল বাইহাটা চাৰিআলিৰ এটা পে’ট্ৰল ডিপোৰ। ৰঙালী বিহুৰ বাবে বেংক বন্ধ থকাত বুধবাৰে বেংকত ধন জমা দিবলৈ আহোতে আৰক্ষীয়ে টকাখিনি জব্দ কৰিছিল।

এই ঘটনাৰ পিছতে সন্থাটোৱে ২৩ এপ্ৰিল পৰ্যন্ত নগদ ধনৰ বিনিময়ত পে’ট্ৰল বা ডিজেল গ্ৰাহকক যোগান নধৰাৰ সিদ্ধান্ত গ্ৰহণ কৰিছিল।