মঙলদৈত আলতাফ মজিদৰ স্মৃতিত চুটি চলচ্চিত্ৰ মহোৎসৱৰ আয়োজন

মঙলদৈৰ এটা আগশাৰিৰ আৰ্থ-সামাজিক বেচৰকাৰী সংস্থা জিপছী গিল্ডে প্ৰয়াত আলতাফ মজিদৰ স্মৃতিত এখন চুটি চলচ্চিত্ৰ মহোৎসৱ আয়োজন কৰিব। চলচ্চিত্ৰ মহোৎসৱৰ সৈতে সংগতি ৰাখি প্ৰয়াত মজিদৰ প্ৰতিকৃতি অংকন ৰাজ্যিক পৰ্যায়ৰ প্ৰতিযোগিতা এখনৰো আয়োজন কৰা হৈছে। উল্লখ্য যে প্ৰয়াত মজিদ চুটি চলচ্চিত্ৰৰ এগৰাকী প্ৰখ্যাৎ পৰিচালক আৰু প্ৰযোজক আছিল।

প্ৰতিযোগিতাখন নৱেম্বৰৰ ৪ তাৰিখৰ পৰা ১১ তাৰিখলৈ চলিব। গিল্ডৰ সম্পাদক জয়ন্ত ডেকাই জনাইছে যে মঙলদৈ টাউন কন্যা প্ৰাথমিক বিদ্যালয়ত প্ৰতিযোগিতাখন অনুষ্ঠিত কৰা হ’ব। উক্ত প্ৰতিযোগিতাখন অষ্টম শ্ৰেণীৰ পৰা স্নাতকোত্তৰ পৰ্যায়ৰ শিক্ষাৰ্থীৰ বাবে মুকলি থাকিব।

দৰঙৰ বাহিৰৰ প্ৰতিযোগীসকলে নৱেম্বৰৰ ৭ তাৰিখলৈকে অনলাইনযোগে অংশগ্ৰহণ কৰিব পাৰিব। প্ৰতিযোগীসকলে ইণ্টাৰনেটৰ পৰা প্ৰখ্যাৎ পৰিচালকগৰাকীৰ আলোকচিত্ৰ সংগ্ৰহ কৰি তাৰ পৰা কলাকৃতি অংকন কৰি sarmah.d@gmail.com ইমেইল ঠিকনাত প্ৰেৰণ কৰিব পাৰে। আগ্ৰহী অংশগ্ৰহণকাৰী সকলে জিপছী গিল্ডৰ মণ্টু কুমাৰ দাসৰ সৈতে মোবাইল নং 99576-64168 ত যোগাযোগ কৰি সবিশেষ তথ্য জানিব পাৰে বুলি সম্পাদক ডেকাই জনাইছে।

আনহাতে প্ৰয়াত আলতাফ মজিদৰ স্মৃতিত চলচ্চিত্ৰ মহোৎসৱৰ তৃতীয় সংস্কৰণটো নৱেম্বৰৰ ১০ আৰু ১১ তাৰিখে অনুষ্ঠিত হ’ব। চলচ্চিত্ৰ মহোৎসৱত শেহতীয়া কেইখনমান বাছকবনীয়া চুটি চলচ্চিত্ৰ প্ৰদৰ্শন কৰা হ’ব। আয়োজকসকলে জনোৱা মতে চলচ্চিত্ৰ মহোৎসৱখন লব্ধপ্ৰতিষ্ঠ চলচ্চিত্ৰ নিৰ্মাতা ড০ শান্তনা বৰদলৈয়ে উদ্বোধন কৰাৰ আশা আছে।