হাফলং : স্থানীয় লোকৰ পৰা ৬০ লাখ টকা লুটি পলায়নৰ চেষ্টা মহিলাৰ
ডিমা হাছাও জিলাত ধন জালিয়াতিৰ অভিযোগত গ্ৰেপ্তাৰ কৰা হৈছে এগৰাকী মহিলাক। শুকুৰবাৰে হাফলং নগৰৰ সাংস্কৃতিক প্ৰেক্ষাগৃহৰ সমীপত গ্ৰেপ্তাৰ কৰা হৈছে মহিলাগৰাকীক।
আৰক্ষীৰ সূত্ৰ অনুসৰি মহিলাগৰাকীয়ে স্বামী সন্তু দাসৰ সৈতে দীৰ্ঘদিন ধৰি হাফলঙত বাস কৰি আছিল আৰু চহৰখনৰ কেইবাজনো বাসিন্দাক প্ৰতাৰণা কৰাৰ অভিযোগ উত্থাপন হৈছিল। একাধিক ব্যক্তিক প্ৰতাৰণা প্ৰায় ৬০ লাখ টকা সংগ্ৰহ কৰাৰ অভিযোগ উত্থাপন হৈছে এই দম্পতীহালৰ বিৰুদ্ধে।
স্থানীয় লোকে জনোৱা মতে, ধন লোৱাৰ পিছত মহিলাগৰাকী আৰু তেওঁৰ স্বামীয়ে চহৰখনৰ পৰা পলায়নৰ চেষ্টা চলাইছিল। শুকুৰবাৰে হাফলঙৰ সাংস্কৃতিক হলৰ ওচৰৰ ভাড়াঘৰৰ প্ৰৱঞ্চনাৰ বলি হোৱা ব্যক্তিসকলে দম্পতীহালক সাক্ষাৎ কৰে।
খবৰ অনুসৰি দম্পতীহালে ধন ঘূৰাই দিবলৈ অস্বীকাৰ কৰাত উত্তেজনা বৃদ্ধি পায়। এই খবৰ পোৱাৰ কিছু সময়ৰ পাছতে আৰক্ষীয়ে ঘটনাস্থলীত উপস্থিত হৈ মহিলাগৰাকীক জিম্মাত লৈ যায়। পিছত তেওঁক সোধা-পোছাৰ বাবে হাফলং আৰক্ষী থানালৈ অনা হয়।
ঘটনাৰ পিছতে এই অভিযোগ উত্থাপন কৰা জালিয়াতিৰ বলি হোৱা লোকসকলে সন্তু দাস আৰু তেওঁৰ পত্নী দুয়োৰে বিৰুদ্ধে হাফলং আৰক্ষী থানাত আনুষ্ঠানিক এজাহাৰ দাখিল কৰে।