‘সকলোকে ক্ষমা কৰি শুই পৰা’! ‘পৰোক্ষ ইচ্ছামৃত্যু’ৰ অনুমতিৰ পাছতে এইমছলৈ নিয়াৰ পূৰ্বে হৰিশ ৰাণাক আৱেগিক বিদায়

সুপ্ৰিম ক’ৰ্টৰ পৰা ‘পৰোক্ষ ইচ্ছামৃত্যু’ৰ আইনী সন্মতি লাভ কৰাৰ পাছতেই গাজিয়াবাদৰ যুৱক হৰিশ ৰাণাক তেওঁৰ পৰিয়ালে এক আৱেগিক পৰিৱেশত শেষ বিদায় জনায়। ২০১৩ চনৰ পৰা সম্পূৰ্ণৰূপে শয্যাশায়ী হৈ থকা হৰিশক জীৱনদায়ী ব্যৱস্থাৰ পৰা আঁতৰাই অনাৰ বাবে দিল্লীৰ এইমছলৈ প্ৰেৰণ কৰে। সৰ্বোচ্চ ন্যায়ালয়ৰ নিৰ্দেশ মৰ্মে চিকিৎসালয়খনৰ বিশেষজ্ঞ চিকিৎসকে এক সুপৰিকল্পিত প্ৰক্ৰিয়াৰে তেওঁৰ জীৱনদায়ী চিকিৎসা সেৱা প্ৰত্যাহাৰ কৰে।

গাজিয়াবাদস্থিত বাসগৃহৰ পৰা হৰিশক এইমছলৈ নিয়াৰ পূৰ্বে সমগ্ৰ পৰিয়াল শোকত ভাগি পৰে। শেহতীয়াকৈ পোহৰলৈ অহা এটা হৃদয়বিদাৰক দৃশ্যত দেখা গৈছে যে বিচনাত নিথৰ হৈ পৰি থকা হৰিশৰ মূৰত হাত বুলাই এগৰাকী মহিলাই কপালত তিলক পিন্ধাই দিছে আৰু কাষতে চকুলো টুকি থিয় হৈ আছে তেওঁৰ মাতৃ। মহিলাগৰাকীয়ে হৰিশক উদ্দেশ্যি কয়, “সকলোকে ক্ষমা কৰি, সকলোৰে পৰা ক্ষমা বিচাৰি শুই পৰা। ঠিক আছে!” প্ৰাপ্ত বাতৰি অনুসৰি, এই মহিলাগৰাকী মাউণ্ট আবুৰ এটা সংগঠনৰ অন্তৰ্গত গাজিয়াবাদৰ মোহন নগৰ সেৱাকেন্দ্ৰৰ চিষ্টাৰ লাভলী আৰু তেওঁৰ সৈতে কোমল নামৰ আন এগৰাকী সদস্যাও উপস্থিত আছিল। হৰিশৰ পিতৃ-মাতৃ এই সংগঠনটোৰ সৈতে জড়িত আৰু তেওঁলোকৰ পুত্ৰৰ মৃত্যুৰ আইনী যুঁজখনত এই সংগঠনটোৱে যথেষ্ট সহায় আগবঢ়াইছিল।

যোৱা সপ্তাহত ভাৰতৰ উচ্চতম ন্যায়ালয়ে হৰিশৰ পিতৃ-মাতৃৰ আৱেদনত সঁহাৰি জনাই তেওঁৰ পৰোক্ষ ইচ্ছামৃত্যুৰ আবেদনত অনুমোদন জনাইছিল। ন্যায়ালয়ে দিল্লী এইমছক নিৰ্দেশ দিছে যে হৰিশৰ জীৱনদায়ী ব্যৱস্থাসমূহ আঁতৰোৱাৰ সময়ত যাতে কোনো কাৰণতে তেওঁৰ মৰ্যাদাহানি নহয়, সেয়া নিশ্চিত কৰিব লাগিব।

উল্লেখ্য যে, প্ৰায় ১৩ বছৰ পূৰ্বে ২০১৩ চনত চণ্ডীগড় বিশ্ববিদ্যালয়ৰ ছাত্ৰাৱাসৰ পঞ্চম মহলাৰ পৰা পৰি গৈ হৰিশ ৰাণাই গুৰুতৰভাৱে আঘাতপ্ৰাপ্ত হৈছিল। এই শোকাৱহ দুৰ্ঘটনাৰ ফলত তেওঁ চিৰদিনৰ বাবে শয্যাশায়ী হৈ পৰে। পুত্ৰৰ এই অসহনীয় যন্ত্ৰণা দূৰ কৰিবলৈ তেওঁৰ পিতৃ-মাতৃয়ে দীৰ্ঘদিন ধৰি আইনী যুঁজ চলাই অৱশেষত ইচ্ছামৃত্যুৰ আবেদন জনাবলৈ বাধ্য হৈছিল, যিটোৱে শেহতীয়াকৈ ন্যায়ালয়ৰ অনুমোদন লাভ কৰে।