“ন্যায়ৰ বাবে যুঁজাটো গৌৰৱৰ কথা, যদি অপৰাধ হয় তেন্তে মোক জেলত ভৰাওক”: মুখ্যমন্ত্ৰী হিমন্ত বিশ্ব শর্মাক প্ৰত্যাহ্বান প্ৰাক্তন আইএএছ বিষয়া হৰ্ষ মন্দৰৰ

অসমৰ মুখ্যমন্ত্ৰী হিমন্ত বিশ্ব শর্মাই সদ্য অসম বিধানসভাত দিয়া এক মন্তব্যত বিতৰ্কিত নাগৰিকত্ব দাবীকাৰীসকলক সহায় কৰা লোকসকলক জেলত ভৰোৱাৰ ভাবুকি প্ৰদান কৰাৰ পিছতে মানৱ অধিকাৰ কৰ্মী তথা অৱসৰপ্ৰাপ্ত আইএএছ বিষয়া হৰ্ষ মন্দৰে তীব্ৰ প্ৰতিক্ৰিয়া প্ৰকাশ কৰিছে।

ছ’চিয়েল মিডিয়া প্লেটফৰ্ম ‘এক্স’ত এটা প’ষ্টত মন্দৰে কৈছে যে তেওঁ এন আৰ চি প্ৰক্ৰিয়া আৰু ডিটেনচন চেণ্টাৰত অমানৱীয়ভাৱে বন্দী হৈ থকা লোকসকলৰ অধিকাৰৰ পক্ষে যুঁজ দিছে আৰু তাত তেওঁ গৌৰৱ অনুভৱ কৰে। তেওঁ কয় —“এই কাম যদি অপৰাধ হয়, তেন্তে মুখ্যমন্ত্ৰী ডাঙৰীয়া, মই জেললৈ যাবলৈ সাজু। মন্দৰে স্পষ্টকৈ উল্লেখ কৰিছে যে তেওঁ এন আৰ চি সন্দৰ্ভত বিতৰ্কিত নাগৰিকত্ব দাবী কৰা লোকসকলৰ অধিকাৰৰ পক্ষে সদায় যুঁজ দিছে, আৰু এই কাৰ্যক তেওঁ অপৰাধ বুলি নাভাবে’

অসম বিধানসভাৰ ১০ জুনৰ অধিৱেশনত মুখ্যমন্ত্ৰী শর্মাই মন্তব্য কৰিছিল যে “তেওঁলোকৰ ৰাজ্যিক সভাপতি হওক, তেওঁলোকৰ সমৰ্থক হৰ্ষ মন্দৰ হওক বা আমেৰিকাৰ আড়ম্বৰপূৰ্ণ বিদ্যালয়ত শিক্ষিত উকীল হওক – অসম কংগ্ৰেছত আজিৰ দিনত পাকিস্তান সমৰ্থকৰ লবী আছে।”

মুখ্যমন্ত্ৰীয়ে চলি থকা বিতাড়ন প্ৰক্ৰিয়াৰ উল্লেখ কৰি কয় যে বৰ্তমান ৩৫ জন বাংলাদেশী নাগৰিকে প্ৰত্যাৱৰ্তনৰ বাবে অপেক্ষা কৰি আছে, যদিও অসমত বান পৰিস্থিতিৰ বাবে তেওঁলোকক আটক কৰি ৰখা হৈছে। অবৈধ অনুপ্ৰৱেশ ৰোধৰ ক্ষেত্ৰত “ভয়-মনোৰোগ” সৃষ্টি কৰাৰ প্ৰয়োজনীয়তাৰ ওপৰতো তেওঁ গুৰুত্ব আৰোপ কৰে আৰু এই বিষয়টো কেৱল “সৰল বিতাড়ন”ৰ পৰা আঁতৰি গৈ বৃহৎ প্ৰসংগত পৰিণত হৈছে বুলি মন্তব্য কৰে।