আনন্দিত কৃষক ৰাইজ; বনৰীয়া হাতীৰ বাবে কৰা খেতি খাই জংঘললৈ উভতিল হাতীৰ জাক

এখন ধাননি পথাৰ য’ত দিনে-পোহৰে বনৰীয়া হাতীৰ এটা বৃহৎ জাক প্ৰবেশ কৰি এফালৰ পৰা তহিলং কৰি নিলে কৃষকৰ চকুৰ সন্মুখতে কষ্টোপাৰ্জিত সোণোৱালী পকা ধান। কিন্তু কোনেও দিয়া নাই বাধা!

এই প্ৰত্যাশিত ঘটনাটি প্ৰত্যক্ষ কৰি কৃষক ৰাইজ হৈ পৰিছে উৎফুল্লিতহে, কি আচৰিত! ভুল নুবুজিব, সেইয়া হৈছে হাতী-মানুহৰ সংঘাত নিৰ্মূলৰ বাবে নগাঁও-কাৰ্বিআংলং সীমান্তৱৰ্ত্তী হাতীখলি ৰংহাং গাঁৱৰ পথাৰত কৰা হৈছে ধান খেতি।

স্থানীয় ৰাইজৰ সহযোগত “হাতীবন্ধু” নামৰ এটা স্বেচ্ছাসেৱী সংগঠনৰ উদ্যোগত গুৱাহাটীৰ জ্যেষ্ঠ নাগৰিক প্ৰদীপ কুমাৰ ভূঞাৰ পৃষ্ঠপোষকতাত তথা চাপানালাৰ প্ৰকৃতিপ্ৰেমী যুৱক বিনোদ দুলু বৰা, তেওঁৰ সহধৰ্মিণী মেঘ্নাময়ূৰ হাজৰিকাৰ নেতৃত্বত বনৰীয়া হাতীক খাদ্য যোগান ধৰিবৰ বাবে এইদৰে ৬০০ বিঘা ভূমিত খেতি কৰিছে।

বিভিন্ন বিধ খেতিৰ ভিতৰত আছে ২০০ বিঘাৰ ধাননি পথাৰখনো।

য’ত বিগত প্ৰায় দহ দিন ধৰি এটা বনৰীয়া হাতীৰ জাকে নিশা ধাননি খনত আহি পকা ধানৰ জুটি লৈছিল যদিও যোৱা দুদিন ধৰি কেৱল ৰাতিয়ে নহয় দিন-দুপৰতে হাতীৰ জাকে আহি ধান খায় যায়।

বিশেষ পথাৰ খনত হাতীয়ে ধান খোৱাৰ এই নান্দনিক দৃশ্য দেখা পাই উৎফুল্লিত ৰংহাং বাসী, উৎফুল্লিত নিজৰ ঘৰৰ পৰা আঁতৰত তিনিমাহকৈ পাহাৰৰ এটা নিৰ্জন টঙীত থাকি দিনে-নিশাই হাতী ৰখা দুলু আৰু মেঘ্না, সফল হাতীবন্ধু প্ৰকৃত উদ্দেশ্য।

উল্লেখযোগ্য যে, যোৱা বছৰো তেওঁলোকে একেটা অঞ্চলতে প্ৰায় ২০০ বিঘা মাটিত বনৰীয়া হাতীৰ বাবে কৃষিকাৰ্য্য কৰি লাভ কৰিছিল অভূতপূৰ্ব সাফল্য।

ইফালে নিকটৱৰ্ত্তী ভৈয়ামৰ গাঁও সমূহৰ কৃষক ৰাইজেও যোৱা বছৰৰ দৰে এই বছৰো আনন্দ মনেৰে ঘৰলৈ কষ্টোপাৰ্জিত নিজৰ খেতি ডৰাৰ পৰা চপাব পাৰিছে সোণগুটি।