খালেক উবাচ! ‘অসম পুত্ৰ মেছি’ৰ বিশ্বকাপ জয়ৰ আনন্দত আত্মহাৰা সাংসদ আব্দুল খালেক
বিশ্বৰ অগণন গুণমুগ্ধৰ মুখত হাঁহি বিৰিঙাই কালি ফিফা বিশ্বকাপৰ স্বৰ্ণিল ট্ৰফীত চুম্বন আঁকিলে মহাতাৰকা লিঅ’নেল মেছিৰ আৰ্জেণ্টিনাই। বিশ্বৰ চুকে-কোণে বিয়পি থকা তাৰকাগৰাকীৰ অযুত অনুৰাগীয়ে ইয়াৰ পিছতে নিজৰ ভাৱাবেগ উজাৰি দিলে সামাজিক মাধ্যমত। পিছপৰি নাথাকিল বৰপেটাৰ সাংসদ আব্দুল খালেকো।
পিছে মেছিৰ বিশ্বজয়ৰ আনন্দ প্ৰকাশ কৰিবলৈ গৈ খালেকে কৰিলে এক আশ্চৰ্যকৰ পোষ্ট। পোষ্টটোৰ বাবে মুহূৰ্ততে হৈ পৰিল হাঁহিয়াতৰ পাত্ৰ। পিছে এনে কি কৰিলে খালেকে, যে সমগ্ৰ দেশতে এতিয়া সাংসদগৰাকী চৰ্চিত হৈ পৰিছে!
টুইটাৰত আৰ্জেণ্টিনাৰ জয়ৰ আনন্দ প্ৰকাশ কৰি খালেকে লিখে, “হৃদয়ৰ নিভৃত কোণৰ পৰা শুভেচ্ছা মৈছি। অসমৰ সৈতে থকা সংযোগৰ বাবে আমি গৌৰৱান্বিত।” ইয়াৰ পাছতে সামাজিক মাধ্যমত উঠে খলকনি।
এগৰাকী ব্যক্তিয়ে খালেকৰ এই টুইটটোৰ কমেণ্টত সাংসদগৰাকীক মেছিৰ অসমৰ সৈতে কেনেধৰণৰ সংযোগ আছে, সেই সম্পৰ্কত প্ৰশ্ন কৰে। অত্যুৎসাহী খালেকেও জনায়, মেছিৰ জন্ম অসমত। পিছে এই টুইটটোক লৈ সৃষ্টি হোৱা ব্যঙ্গৰ পাছতে খালেকে ডিলিট কৰে টুইটটো।
টুইট ডিলিট কৰি খালেকে আকৌ আনকহে ভুৱা প্ৰতিপন্ন কৰি তেওঁৰ ছ’চিয়েল মিডিয়াৰ হেণ্ডেল পৰীক্ষা কৰিবলৈ কয় আৰু উৰাবাতৰি প্ৰচাৰ নকৰিবলৈ কয়। অৱশ্যে তেতিয়ালৈকে বহু লোকে এই টুইটৰ স্ক্ৰীণশ্বট লৈ থোৱাৰ বাবে বিপাঙত পৰে খালেক।
প্ৰকৃততে সাংসদ আব্দুল খালেক সামাজিক মাধ্যমত ভাইৰেল হোৱা এক ব্যঙ্গৰহে চিকাৰ হয়। কেইদিনমান পূৰ্বে এগৰাকী যুৱকে ফেচবুকত শ্বেয়াৰ কৰিছিল এক ব্যঙ্গাত্মক পোষ্ট। পোষ্টটোত তেওঁ মেছি অসমৰ যোৰহাট জিলাত জন্ম হোৱা বুলি ব্যঙ্গ কৰিছিল।
এই পোষ্টটোৰ কথাখিনিকে সঁচা বুলি ভাবি কংগ্ৰেছ সাংসদ আব্দুল খালেকে টুইটাৰত মেছিয়ে অসমত জন্মলাভ কৰা বুলি মন্তব্য কৰিছিল।