স্বাস্থ্য খণ্ডৰ সংকট! দেশৰ ২০খন এইমছত খালী হৈ আছে ২,১৮১টা অধ্যাপক বা শিক্ষক-চিকিৎসকৰ পদ
দেশৰ অন্যতম শীৰ্ষ চিকিৎসা প্ৰতিষ্ঠানসমূহত শিক্ষকৰ সংকট এতিয়াও ডাঙৰ চিন্তাৰ বিষয়। দেশৰ ২০খন অপাৰেচনেল এইমছ চিকিৎসালয়ত অনুমোদিত ৬,৩০৪টা অধ্যাপক বা শিক্ষক-চিকিৎসকৰ পদৰ ভিতৰত এতিয়া ২১৮১টা পদ খালী। অৰ্থাৎ প্ৰায় প্ৰতি তিনিটা পদৰ ভিতৰত এটাকৈ পদ খালী হৈ আছে। কেৱল শিক্ষকেই নহয়, ১৫,১৫৯টা নন-ফেকাল্টি পদতো নাটনি হৈছে। শুকুৰবাৰে লোকসভাত এক প্ৰশ্নৰ লিখিত উত্তৰত কেন্দ্ৰীয় স্বাস্থ্য ৰাজ্যমন্ত্ৰী প্ৰতাপ্ৰৰাও জাধৱে এই তথ্য প্ৰদান কৰে।
চৰকাৰী তথ্য অনুসৰি দেশৰ সৰ্ববৃহৎ আৰু অতি ব্যস্ত দিল্লী এইমছতো পৰিস্থিতি উদ্বেগজনক। তাত অনুমোদিত ১৩১৩টা অধ্যাপক পদৰ ভিতৰত ৮৭৭টা পদতহে অধ্যাপক আছে। ফলত ৪৩৬টা পদ এতিয়াও খালী হৈ আছে। একে সময়তে অনুমোদিত ১৩,৯১৩টা নন-ফেকাল্টি পদৰ ভিতৰত ২,৪৬১টা পদ খালী।
একাংশ বিশেষজ্ঞৰ মতে দেশৰ বিভিন্ন এইমছত শিক্ষকৰ সংকট যদি দীৰ্ঘদিন ধৰি অব্যাহত থাকে তেন্তে নতুন এইমছত চিকিৎসা সেৱা, গৱেষণা আৰু উচ্চ শিক্ষাৰ সম্প্ৰসাৰণতো ইয়াৰ প্ৰভাৱ পৰিব পাৰে।
কেন্দ্রই জনোৱা মতে, খালী পদ পূৰণৰ বাবে কেইবাটাও পদক্ষেপ গ্রহণ কৰা হৈছে৷ নিয়মীয়া স্থায়ী বাছনি সমিতিৰ জৰিয়তে নিযুক্তি প্ৰক্ৰিয়া সম্পন্ন কৰা হৈছে। প্ৰয়োজন অনুসৰি অৱসৰপ্ৰাপ্ত অধ্যাপকসকলক ৭০ বছৰ বয়সলৈকে ঠিকাভিত্তিকভাৱে নিযুক্তি দিয়াৰ সুযোগ দিয়া হৈছে। ইয়াৰ উপৰিও নন-ফেকাল্টি পদত নিযুক্তি ক্ষিপ্ৰতাৰে কৰিবলৈ ‘ন’ৰছেট’কে ধৰি সাধাৰণ নিযুক্তি পৰীক্ষা ব্যৱস্থাও ৰূপায়ণ কৰা হৈছে।
কিন্তু বিৰোধীয়ে দাবী কৰিছে যে দেশৰ শীৰ্ষ চৰকাৰী চিকিৎসা প্ৰতিষ্ঠানসমূহত ইমান বৃহৎ সংখ্যক খালী পদে ৰোগীৰ সেৱা, চিকিৎসা শিক্ষা আৰু গৱেষণাৰ মানদণ্ডত প্ৰত্যক্ষভাৱে প্ৰভাৱ পেলাব পাৰে। যদিও কেন্দ্ৰই দাবী কৰিছে যে পৰ্যায়ক্ৰমে নিযুক্তিৰ জৰিয়তে খালী পদ হ্ৰাস কৰাৰ কাম চলি আছে আৰু শেহতীয়া নিযুক্তি অভিযানত বহু পদ পূৰণ কৰা হৈছে।