সন্ত্ৰাসবাদী কূটাঘাতৰ যো-জা! মহাৰাষ্ট্ৰৰ উপকূলত উদ্ধাৰ মাৰণাস্ত্ৰ ভৰ্তি নাও

মহাৰাষ্ট্ৰ ৰায়গড়ৰ উপকূলত কিছু সময় পূৰ্বে কেইবাপ্ৰকাৰৰো মাৰণাস্ত্ৰসহ এখন সন্দেহজনক নাও উদ্ধাৰক লৈ তীব্ৰ চাঞ্চল্যৰ সৃষ্টি হৈছে।

ৰায়গড়ৰ হৰিহৰেশ্বৰ তীৰৰ ওচৰত জব্দ কৰা নাওখন কেইবাটাও এ কে ৪৭ ৰাইফল, গুলী-বাৰুদ তথা বিস্ফোৰক সামগ্ৰীৰে ভৰ্তি হৈ আছিল বুলি স্থানীয় কৰ্তৃপক্ষই সদৰী কৰিছে।

ঘটনাস্থলীত উপস্থিত হৈ বৰ্তমান স্থানীয় আৰক্ষীয়ে বিষয়টোৰ তদন্ত আৰম্ভ কৰিছে। নাওখন উদ্ধাৰৰ পাছতে আৰক্ষীয়ে জিলাখনত উচ্চ সতৰ্কতা জাৰি কৰাৰ লগতে অঞ্চলবোৰত নিৰাপত্তা ব্যৱস্থা কটকটীয়া কৰি তুলিছে।

প্ৰকাশিত বাতৰি অনুসৰি জব্দ কৰা নাওখন অষ্ট্ৰেলিয়াত নিৰ্মিত। নাওখনত থকা লোকসকলে হৰিহৰেশ্বৰ সাগৰৰ পাৰত প্ৰৱেশৰ বিষয়ে উপকূলৰক্ষী সকলক অৱগত কৰা নাছিল বুলিও বাতৰি প্ৰকাশ পাইছে।

নাওখনত এই যুদ্ধাস্ত্ৰ উদ্ধাৰক কেন্দ্ৰ কৰি সন্ত্ৰাসবাদীৰ কূটাঘাতৰ আশংকা কৰা হৈছে। উল্লেখ্য যে হৰিহৰেশ্বৰ তীৰ মুম্বাইৰ পৰা মাত্ৰ ২০০ কিলোমিটাৰ আৰু পুনেৰ পৰা ১৭০ কিলোমিটাৰ দূৰত।

এনে অৱস্থাত এক ভয়াৱহ কূটাঘাতৰ আশংকাত ৰাজ্যৰ আৰক্ষী প্ৰশাসনে নিৰাপত্তা ব্যৱস্থা শক্তিশালী কৰি তুলিছে।