শীত কালত কিদৰে ভালে ৰাখিব পেটৰ  স্বাস্থ্য

শীতকালত আমাৰ হজম শক্তি অলপ লেহেমীয়া হয় আৰু পানী খোৱাৰ পৰিমাণ কমি যোৱাৰ বাবে গেছ বা কোষ্ঠকাঠিন্যৰ দৰে সমস্যাই দেখা দিয়ে। শীতকালত পেটটো সুস্থ আৰু সক্ৰিয় কৰি ৰাখিবলৈ আপুনি তলত দিয়া উপায়বোৰ অনুসৰণ কৰিব পাৰে:

১. পৰ্যাপ্ত পৰিমাণে পানী খাব

ঠাণ্ডাৰ দিনত পিয়াহ কমকৈ লাগে, যাৰ ফলত শৰীৰত পানীৰ অভাৱ হয়। ইয়াৰ ফলত কোষ্ঠকাঠিন্য হ’ব পাৰে। সেয়েহে দিনটোত অন্ততঃ ২-৩ লিটাৰ পানী খোৱাৰ অভ্যাস কৰক। কুহুমীয়া গৰম পানী খালে হজম শক্তি বৃদ্ধি পায়।

২. ফাইবাৰযুক্ত খাদ্য গ্ৰহণ কৰক

শীতকালত পোৱা সতেজ শাক-পাচলি আৰু ফল-মূলবোৰত প্ৰচুৰ পৰিমাণে ফাইবাৰ থাকে। পালেং, বন্ধাকবি, ফুলকবি আৰু মূলা, আপেল, মধুৰীআম আৰু কমলা খাব লাগে। ফাইবাৰে শৌচ খোলোচা কৰাত সহায় কৰে।

৩. আদা আৰু মৌৰ ব্যৱহাৰ

আদাই হজম শক্তি উন্নত কৰে আৰু পেট ফুলা বা গেছৰ সমস্যা দূৰ কৰে। আপুনি আদা দিয়া চাহ খাব পাৰে বা কুহুমীয়া পানীত আদাৰ ৰস আৰু মৌ মিহলাই খাব পাৰে।

৪. ঘৰত বনোৱা গৰম খাদ্য খাওক

বাহিৰৰ তেলত ভজা বা মচলাযুক্ত খাদ্য পৰিহাৰ কৰক। সদায় সতেজ আৰু গৰম খাদ্য খোৱাৰ চেষ্টা কৰক। বিশেষকৈ ৰাতিৰ আহাৰ পাতল হোৱাটো ভাল।

৫. দৈ বা প্ৰ’বায়োটিক

দৈত থকা উপকাৰী বেক্টেৰিয়াই আমাৰ অন্ত্ৰ সুস্থ কৰি ৰাখে। যদি অতিপাত ঠাণ্ডাৰ বাবে দৈ খাবলৈ টান পায়, তেন্তে দুপৰীয়াৰ ভাগত অলপ খাব পাৰে।

৬. নিয়মিত ব্যায়াম কৰক

শীতকালত আমি এলেহুৱা হৈ পৰোঁ, যাৰ বাবে খাদ্য সঠিকভাৱে হজম নহয়। খোৱাৰ পিছত অলপ খোজ কঢ়া বা ঘৰৰ ভিতৰতে যোগাসন কৰিলে হজম প্ৰক্ৰিয়া সক্ৰিয় হৈ থাকে।

৭. এইবোৰ বস্তুৰ পৰা আঁতৰি থাকক:

• অধিক পৰিমাণে চাহ বা কফি খোৱা।
• অধিক চেনিযুক্ত মিঠাই।
• ৰাতি দেৰিকৈ আহাৰ গ্ৰহণ কৰা।