মধ্য অসম বন্ধ প্ৰত্যাহাৰ সত্তেও ২২ নৱেম্বৰৰ বৰাক বন্ধ বাহাল থাকিব
হিন্দুস্তান কাগজ নিগমৰ নগাঁও আৰু কাছাৰ কল পুনৰুজ্জীৱিতকৰণৰ লগতে ২১ মাহ ধৰি অনাদায় হৈ থকা কৰ্মচাৰীৰ দৰমহা শীঘ্ৰে আদায়ৰ দাবীত অহা ২২ নৱেম্বৰত আহ্বান জনোৱা মধ্য অসম বন্ধ প্ৰত্যাহাৰ কৰিছে হিন্দুস্তান পেপাৰ মিল ৰিভাইভেল একচন কমিটী অন্তৰ্ভুক্ত নগাঁও কাগজকলৰ কৰ্মচাৰী আৰু ট্ৰেড যুনিয়নৰ একাংশ সংগঠনে। মুখ্য মন্ত্ৰী সোণোৱালৰ সৈতে আলোচনাত সমস্যা সমাধানৰ আশ্বাস পোৱাত এই বন্ধ প্ৰত্যাহাৰ কৰিছে বুলি সংগঠন কেইটাই জনাইছে।
ইপিনে মঙলবাৰে এটা বিবৃতিৰ জৰিয়তে মৰিগাঁও জিলা কৃষক মুক্তি সংগ্ৰাম সমিতিয়ে উক্ত বন্ধৰ সৈতে জড়িত নহয় বুলি ঘোষণা কৰিছে। মৰিগাঁও জিলা কৃষক মুক্তি সংগ্ৰাম সমিতিৰ সম্পাদক দেৱজিৎ পাতৰে কয় যে কাগজ কল দুটা কাৰ্যক্ষম হোৱাটো কৃষক মুক্তিৰ অন্যতম দাবী আৰু বন্ধৰ বাহিৰে সকলোধৰণৰ গণতান্ত্ৰিক আন্দোলনক সংগঠনটোৱে সমৰ্থন আৰু সহযোগিতা আগবঢ়াব।
আনহাতে উক্ত দিনটোত বৰাক উপত্যকা উপত্যকা বন্ধ থাকিব বুলি জানিব পৰা গৈছে। শিলচৰত এটা বৃহৎ সমদল বাহিৰ কৰিব হিন্দুস্তান পেপাৰ মিল পুনৰ কাৰ্যক্ষম একশ্যন কমিটীয়ে ২১ তাৰিখ বুধবাৰে জানিবলৈ দিছে।
২২ নৱেম্বৰত আহ্বান দিয়া বন্ধ সফল কৰাৰ বাবে হিন্দুস্তান পেপাৰ মিল পুনৰ কাৰ্যক্ষম একশ্যন কমিটীৰ আহ্বায়ক মানৱেন্দ্ৰ চক্ৰবৰ্তীয়ে আহ্বান জনাইছে।