পত্নীক হত্যা কৰাৰ পিছত ড্ৰামত লুকুৱালে মৃতদেহ, তাৰ ওপৰত ঢালি দিলে চিমেণ্ট; ধৰা পৰিল কেনেকৈ?
গুজৰাটৰ চুৰাটত এজন লোকে পত্নীক হত্যা কৰি উৱলি যোৱা মৃতদেহ কাঠৰ ড্ৰামত লুকুৱাই ৰাখিছিল। পুলিচক বিভ্ৰান্ত কৰিবলৈ তেওঁ নিৰুদ্দেশ হোৱা ব্যক্তিৰ ডায়েৰী দাখিল কৰিছিল। অৱশ্যে তাতো ৰক্ষা নপৰিল। এগৰাকী নাবালকৰ তৎপৰতাত এই সমগ্ৰ ঘটনা ফাদিল হৈ পৰে।
পেছাত ডায়েটিচিয়ান শিল্পা ছালভিৰ মৃত্যুৰ পিছত তেওঁৰ স্বামী অভিযুক্ত বিশাল ছালভি (৪০) পলাতক হৈ আছে।
কিছুদিন পূৰ্বে বিশালে থানালৈ গৈ তেওঁৰ ৩৯ বছৰীয়া পত্নী শিল্পা চাৰিদিন ধৰি নিৰুদ্দেশ হোৱা বুলি দাবী কৰিছিল। আৰক্ষীয়ে নিয়মীয়াকৈ তদন্ত আৰম্ভ কৰিলে যদিও অতি সোনকালেই কাহিনীটোৱে এটা মোৰ ল’লে।
দম্পতীহালৰ নাবালক সন্তানে ঘৰৰ পৰা এখন হাতে লিখা নোট উদ্ধাৰ কৰি আৰক্ষীক গতাই দিয়ে। তদন্তকাৰীয়ে দাবী কৰিছে যে সেইখন বিশালে লিখিছিল, য’ত তেওঁ নিজৰ ‘মাৰাত্মক ভুল’ স্বীকাৰ কৰি শিল্পা আৰু জীয়াই নাই বুলি কৈছিল।
সেই টোকাটো পোৱাৰ লগে লগে তদন্তৰ দিশ সলনি হ’ল। বিশালৰ গতিবিধি অনুসৰণ কৰি আৰক্ষীয়ে ছালাবতপুৰা থানা এলেকাৰ এটা পুৰণি আৰু পৰিত্যক্ত ঘৰৰ স্থান উদ্ধাৰ কৰে। তলা লগোৱা ঘৰটোৰ এটা অংশ ভাঙি যোৱাৰ লগে লগে ভিতৰৰ পৰা এটা প্ৰচণ্ড গোন্ধ আহিবলৈ ধৰিলে। ঘৰৰ চুকত ৰখা এটা ডাঙৰ কাঠৰ ড্ৰাম বা ট্ৰাংক খুলি দিয়াৰ লগে লগে শিল্পাৰ উৱলি যোৱা মৃতদেহ উদ্ধাৰ হয়। প্ৰাথমিক অনুসন্ধানত দেখা গৈছে যে মৃতদেহটো লুকুৱাবলৈ ওপৰৰ পৰা কেঁচা চিমেণ্ট ঢালি দিয়া হৈছিল।
আৰক্ষীৰ প্ৰাৰম্ভিক ধাৰণাটো হ’ল যে নিৰুদ্দেশ ডায়েৰী দাখিল কৰাৰ ৪-৫ দিন আগতে শিল্পাক হত্যা কৰা হৈছিল। দীৰ্ঘদিনীয়া বৈবাহিক বিবাদ আৰু পত্নীৰ বিবাহ বহিৰ্ভূত সম্পৰ্কৰ সন্দেহ এই হত্যাকাণ্ডৰ আঁৰৰ মূল কাৰণ হ’ব পাৰে। ডিচিপি কানন দেশাইয়ে কয় যে মৰণোত্তৰ পৰীক্ষাৰ প্ৰতিবেদন অপেক্ষা কৰা হৈছে আৰু ফৰেনছিক দলে ঘটনাস্থলীৰ পৰা তথ্য সংগ্ৰহ কৰিছে।
চুৰাট আৰক্ষীয়ে একাধিক দল গঠন কৰি অভিযুক্ত বিশালক গ্ৰেপ্তাৰ কৰিবলৈ অভিযান অব্যাহত ৰাখিছে। তেওঁক বিচাৰি উলিয়াবলৈ চিচিটিভি ফুটেজ আৰু স্থানীয় সূত্ৰৰ সহায় লোৱা হৈছে।