কোহলীতকৈও শ্ৰেষ্ঠ! স্ব-বন্দনাত মুখৰ কোন এই পাকিস্তানী ক্ৰিকেটাৰ?

সাম্প্ৰতিক ক্ৰিকেট বিশ্বত শ্ৰেষ্ঠ বেটাৰ কোন? এই প্ৰশ্নটোৰ উত্তৰত কেইবাটাও নাম সমুখলৈ আহে যদিও সৰ্বপ্ৰথমে উচ্চাৰিত হোৱা নামটোৱেই হৈছে বিৰাট কোহলী। ভাৰতীয় তাৰকাগৰাকীক সমগ্ৰ বিশ্বৰ ক্ৰিকেট অনুৰাগীৰ লগতে ক্ৰিকেট বিশেষজ্ঞ তথা প্ৰাক্তন ক্ৰিকেট তাৰকাসকলে সাম্প্ৰতিক সময়ৰ শ্ৰেষ্ঠ বেটাৰ বুলি একেমুখে স্বীকাৰ কৰিছে।

কিন্তু কোহলীক বিশ্ব ক্ৰিকেটৰ শ্ৰেষ্ঠ বেটাৰ হিচাপে মানিবলৈ সন্মত নহয় পাকিস্তানৰ এগৰাকী খেলুৱৈ। বৰং এই খেলুৱৈগৰাকীয়ে কোহলীতকৈ নিজকহে শ্ৰেষ্ঠ বেটাৰ হিচাপে দাবী কৰিছে। স্ব-বন্দনাত মুখৰ এই খেলুৱৈগৰাকীৰ নাম খুৰাম মঞ্জুৰ।

আন্ত:ৰাষ্ট্ৰীয় ক্ৰিকেটত পাকিস্তানক প্ৰতিনিধিত্ব কৰা খুৰামে অৱশ্যে ৰাষ্ট্ৰীয় নিৰ্বাচকসকলৰ বঞ্চনাৰ বাবে তেওঁৰ আন্তঃৰাষ্ট্ৰীয় ক্ৰিকেট কেৰিয়াৰ দীঘলীয়া হোৱা নাছিল বুলি দাবী কৰিছে।

কোহলীতকৈ নিজকে শ্ৰেষ্ঠ বুলি দাবী কৰাৰ আত্মপক্ষত তেওঁ দাঙি ধৰিছে যুক্তিও। খুৰামৰ মতে তেওঁৰ প্ৰদৰ্শন ঘৰুৱা আৰু আন্তঃৰাষ্ট্ৰীয় এদিনীয়া মেচত কোহলীৰ তুলনাত যথেষ্ট উন্নত।

খুৰামে কয়, “মই নিজকে কোহলীৰ সৈতে তুলনা কৰিবলৈ সাজু নহয়। প্ৰকৃততে ৫০ অভাৰৰ ক্ৰিকেটত বিশ্বৰ শীৰ্ষ ১০ গৰাকী খেলুৱৈ যিয়েই নহওঁক, ময়েই এক নম্বৰত। কোহলীৰ নাম মোৰ পিছত আহিব পাৰে।’’

”লিষ্ট এ ক্ৰিকেটত সাধাৰণ ইনিংছ এটাক বৃহৎ স্ক’ৰলৈ পৰিৱৰ্তন কৰাত ময়েই আটাইতকৈ ভাল। যোৱা ১০ বছৰত মোৰ ৰানৰ গড় ৫৩ তকৈও অধিক। কোহলীয়ে প্ৰতি ছয়টা ইনিংছত এটা শতক অৰ্জন কৰিছে। মই প্ৰতি ৫.৬৮ ইনিংছত শতক অৰ্জন কৰিছো।”— খুৰামে লগতে কয়।

খেলুৱৈগৰাকীৰ মতে, প্ৰথম শ্ৰেণীৰ ক্ৰিকেটত তেওঁ বিশ্ব ৰেংকিঙত পাঁচ নম্বৰত আছে। “যোৱা ৪৮ টা ইনিংছত মোৰ শতকৰ সংখ্যা ২৪ টা। ২০১৫ চনৰ পৰা মই পাকিস্তানৰ হৈ সৰ্বশ্ৰেষ্ঠ পদৰ্শন কৰি আহিছো।’’- তেওঁ কয়।

”কিন্তু মই সদায় বঞ্চনাৰ চিকাৰ হৈ আহিছো। মোক পাকিস্তানৰ জাতীয় দলত স্থান নিদিয়াৰ যুক্তিসঙ্গত কাৰণ কোনেও ক’ব নোৱাৰে।’’ বুলি ক্ষোভ প্ৰকাশ কৰে খুৰাম মঞ্জুৰে।

উল্লেখ্য যে প্ৰথম শ্ৰেণীৰ ক্ৰিকেটত খেলুৱৈগৰাকীয়ে ১৬৬ খন মেচত ৫৩.৪২ গড়ে ৭৯৯২ ৰাণ সংগ্ৰহ কৰিছে। শতকৰ সংখ্যা হৈছে ২৭। এই পৰিসংখ্যাৰ ক্ষেত্ৰত ৩৬ বছৰীয়া পাকিস্তানী বেটছমেনজনে প্ৰতি ৬.১১ ইনিংছত এটাকৈ শতক অৰ্জন কৰিছে।

প্ৰথম শ্ৰেণীৰ ক্ৰিকেটত নূন্যতম ১০০ টা ইনিংছ খেলা সমগ্ৰ ক্ৰিকেট বিশ্বৰ বেটাৰসকলৰ ভিতৰত খুৰাম মঞ্জুৰ ষষ্ঠ স্থানত আছে। ২০০৮ চনৰ পৰা ২০১৬ চনলৈ মঞ্জুৰে দেশৰ হৈ ১৬ খন টেষ্ট, সাতখন এদিনীয়া মেচ আৰু তিনিখন টি-২০ খেলিছিল। এদিনীয়া আন্তঃৰাষ্ট্ৰীয়ত তেওঁৰ সৰ্বাধিক স্ক’ৰ হৈছে ৮৩। সাতখন খেলত তেওঁ ৩৩.৭১ গড়ে মুঠ ২৩৬ ৰাণ সংগ্ৰহ কৰিছিল।

আনহাতে, কোহলীয়ে ২৭১ খন আন্ত:ৰাষ্ট্ৰীয় এদিনীয়া মেচত ১২,৮০৯ ৰাণ সংগ্ৰহ কৰিছে। এদিনীয়াত ৫৭.৭ গড়েৰে ৰান সংগ্ৰহ কৰা কোহলীৰ নামত আছে ৪৬ টা এদিনীয়া শতক। এই ক্ষেত্ৰত কোহলীতকৈ আগত আছে কেৱল ক্ৰিকেটৰ ভগৱান খ্যাত শচীন টেণ্ডুলকাৰ। টেণ্ডুলকাৰে এদিনীয়াত সংগ্ৰহ কৰিছিল মুঠ ৪৯ টা শতক।