Helicopter crash প্ৰতিৰক্ষা বাহিনীৰ মুৰব্বী বিপিন ৰাৱাটৰ হেলিকপ্তাৰ দুৰ্ঘটনাগ্ৰস্ত, ১১জন নিহত video

এক ভয়ংকৰ দুৰ্ঘটনাত পতিত হৈছে ভাৰতীয় প্ৰতিৰক্ষা বাহিনীৰ মুৰব্বী বিপিন ৰাৱাট উঠি যোৱা হেলিকপ্তাৰ।

আজি দিনৰ ভাগত বিপিন ৰাৱাটে তেওঁৰ পৰিয়ালৰ সদস্যৰ লগতে আন কেইবাজনো লোকৰ সৈতে হেলিকপ্তাৰ খনৰে যাত্ৰা কৰি থকাৰ সময়তে তামিলনাডুৰ কুনুৰত হেলিকপ্তাৰ খন দুৰ্ঘটনাত পতিত হয়।

এই ঘটনাত ১১জন লোকৰ মৃত্যু ঘটাৰ কথা নিশ্চিত কৰা হৈছে। জানিব পৰা মতে হেলিকপ্তাৰ খনত মুঠ ১৪ গৰাকী লোক আছিল।

দুৰ্ঘটনাটো সংঘটিত হোৱাৰ পিছতে উদ্ধাৰ অভিযান চলাই তিনি জন লোকক আহত অৱস্থাত উদ্ধাৰ কৰিব পৰা গৈছে।

তেওঁলোকক নীলগিৰিৰ ৱেলিংটন কেণ্টনমেণ্টৰ চিকিৎসালয়ত ভৰ্তি কৰোৱা হৈছে।

ভাৰতীয় বাযু সেনা বাহিনীৰ এম আই চিৰিজৰ হেলিকপ্তাৰ খন আজি দিনৰ ১২ বাজি ১০ মিনিটত কোম্বাইটৰ আৰু আৰু ছুলুৰৰ মাজৰ কুনুৰত দুৰ্ঘটনাত পতিত হয় ।

দুৰ্ঘটনাৰ ফলত হেলিকপ্তাৰ খন খণ্ড-বিখণ্ড হৈ পৰাৰ লগতে জুইত জাহ যায়।

এতিয়ালৈ উদ্ধাৰ কৰা লোক কেইজনৰ মাজৰে দুজনৰ দেহ ৮০ শতাংশ জ্বলি গৈছে।

দুৰ্ঘটনাটো সংঘটিত হোৱাৰ পিছতে সমগ্ৰ অঞ্চলটো জুই আৰু ধোঁৱাই আৱৰি ধৰে।

স্থানীয় লোকে উদ্ধাৰকাৰীৰ দলক উদ্ধাৰ অভিযানত সহায় কৰি আছে।

বাতৰি যুগুত কৰা পৰলৈকে তিনিওটা প্ৰতিৰক্ষা বাহিনীৰ মুৰব্বী চীফ অব ডিফেন্স ষ্টাফ বিপিন ৰাৱাট আৰু তেওঁৰ পত্নীৰ কোনো সন্ধান পোৱা হোৱা নাই।