চলিত বছৰৰ টি-২০ বিশ্বকাপৰ আশা ক্ষীণ; ১০ জুনত হ’ব চূড়ান্ত সিদ্ধান্ত
আন্তঃৰাষ্ট্ৰীয় ক্ৰিকেট পৰিষদ (আই চি চি) ব’ৰ্ডৰ অধ্যক্ষ শশাংক মনোহৰৰ নেতৃত্বত বৃহস্পতিবাৰে টেলিকনফাৰেন্সৰ জৰিয়তে অনুষ্ঠিত এখন বৈঠকত কেইবাটাও গুৰুত্বপূৰ্ণ সিদ্ধান্ত লোৱা হয়।
চলিত বছৰৰ শেষৰফালে অষ্ট্ৰেলিয়াত অনুষ্ঠিত হ’ব লগীয়া টি-২০ ক্ৰিকেট বিশ্বকাপ সন্দৰ্ভত অহা ১০ জুনত সিদ্ধান্ত ল’ব।
উল্লেখ্য যে ক’ৰ’না ভাইৰাছে সংহাৰী ৰূপ ধাৰণ কৰাৰ প্ৰতি লক্ষ্য ৰাখি আয়োজকৰ লগতে বিভিন্ন পক্ষই চলিত বছৰৰ টি-২০ বিশ্বকাপ পিছুৱাবলৈ মন মেলিছিল।
কালিৰ বৈঠক সন্দৰ্ভত আই চি চিৰ এজন বিষয়ববীয়াই কয় যে ১৮ অক্টোবৰৰ পৰা ১৫ নৱেম্বৰলৈ অষ্ট্ৰেলিয়াত অনুষ্ঠিত হ’ব লগীয়া টি-২০ বিশ্বকাপ প্ৰসংগত অহা ১০ জুনত ব’ৰ্ডৰ বৈঠকত সিদ্ধান্ত লোৱা হ’ব।
উল্লেখ্য যে ইয়াৰ পিছৰ টি-২০ বিশ্বকাপ অৰ্থাৎ ২০২১ৰ বিশ্বকাপ ভাৰতত অনুষ্ঠিত হ’ব। ইফালে যদি চলিত বছৰৰ বিশ্বকাপখন অনুষ্ঠিত নহয় তেন্তে ইয়াক ২০২২ চনলৈকে স্থগিত কৰাৰ সম্ভাৱনা আছে।
ক’ভিড-১৯ৰ কাৰণে ক্ৰীড়া ক্ষেত্ৰখন সাংঘাটিকভাৱে স্থবিৰ হৈ পৰিছে। মহামাৰী ক’ৰ’নাৰ বাবে অলিম্পিক, ফুটবল য়ুৰো কাপৰ লগতে ডাঙৰ ডাঙৰ স্প’ৰ্টছ টুৰ্ণামেণ্ট সমূহ ইতিমধ্যে বাতিল কৰিব লগীয়া হৈছে।