জে ই ই এডভান্সড পৰীক্ষাৰ তথ্য ফাদিল হোৱাৰ দাবী সম্পূৰ্ণ ভিত্তিহীন, স্পষ্টীকৰণ দিলে আই আই টি ৰুৰকী আৰু শিক্ষা মন্ত্ৰালয়ে

এই বৰ্ষৰ জে ই ই এডভান্সড পৰীক্ষা অনুষ্ঠিত কৰা আই আই টি ৰুৰকীয়ে লাখ লাখ পৰীক্ষাৰ্থীৰ ব্যক্তিগত তথ্য ফাদিল আৰু গোপনীয়তা ভংগ হোৱা বুলি ওলোৱা খবৰবোৰ সম্পূৰ্ণৰূপে অস্বীকাৰ কৰিছে। প্ৰতিষ্ঠানখনে জনাইছে যে ছচিয়েল মিডিয়াত প্ৰচাৰ হোৱা এই দাবীবোৰ বিভ্ৰান্তিকৰ আৰু তথ্যগতভাৱে ভুল। এটা ক্লাউড ষ্টৰেজৰ সাময়িক কাৰিকৰী ত্ৰুটিৰ বাবে কোনো ধৰণৰ স্পৰ্শকাতৰ তথ্য লোকচান হোৱা নাই বা কোনো ব্যাপক তথ্য চুৰি হোৱা নাই। কেন্দ্ৰীয় শিক্ষা মন্ত্ৰালয়েও এই সন্দৰ্ভত এক বিবৃতি জাৰি কৰি পৰীক্ষাৰ ফলাফল, নম্বৰ আৰু শিক্ষাৰ্থীসকলৰ সকলো তথ্য সম্পূৰ্ণ নিৰাপদ আৰু অক্ষত অৱস্থাত আছে বুলি দেশবাসীক নিশ্চিত কৰিছে।

আই আই টি ৰুৰকীৰ মতে, যোৱা ২ জুনত পৰীক্ষাৰ্থীসকলে প্ৰৱেশ পত্ৰ বা এডমিট কাৰ্ড চাবৰ বাবে কিছু অসুবিধা পাইছিল। সেই অসুবিধা দূৰ কৰিবলৈ আৰু পঞ্জীয়ন প্ৰক্ৰিয়াটো সুচাৰুৰূপে চলাবলৈ প্ৰতিষ্ঠানৰ তৰফৰ পৰা অতি সোনকালে কিছুমান কাৰিকৰী পদক্ষেপ লোৱা হৈছিল। ইয়াৰ ফলতে ক্লাউড ষ্টৰেজৰ এটা অংশত এক সামান্য আৰু সাময়িক ত্ৰুটি ঘটিছিল। ৰাইলিন অনিল নামৰ এজন ১৬ বছৰীয়া ডেকা চাইবাৰ নিৰাপত্তা গৱেষক তথা এথিকেল হেকাৰে এই ত্ৰুটিটো ধৰা পেলাইছিল আৰু ইয়াৰ জৰিয়তে ডাটাবেচটো চাব পৰা গৈছে বুলি কৰ্তৃপক্ষক জনাইছিল। অৱশ্যে প্ৰতিষ্ঠানখনে বিষয়টো জনাৰ লগে লগেই অতি তৎপৰতাৰে ইয়াক সংশোধন কৰে আৰু তথ্যৰ সুৰক্ষা সুনিশ্চিত কৰে।

প্ৰতিষ্ঠানটোৱে লগতে স্পষ্ট কৰি দিছে যে যিটো ষ্টৰেজত এই কাৰিকৰী ত্ৰুটি হৈছিল, সেয়া কেৱল পঢ়িব পৰা বা ৰীড অনলি অৱস্থাতহে ছিল। ইয়াৰ অৰ্থ হৈছে তাত থকা কোনো তথ্য কোনেও সালসলনি কৰিব বা মচি পেলাব নোৱাৰিলেহেঁতেন। ইয়াৰ উপৰিও ক্লাউড এক্সেছ লগ পৰীক্ষা কৰি দেখা গৈছে যে কোনো ধৰণৰ বৃহৎ পৰিমাণৰ ডাটা ডাউনল’ড কৰা হোৱা নাই। এই ত্ৰুটিৰ বাবে সমগ্ৰ ডাটাৰ মাত্ৰ ০.০৫ শতাংশতকৈও কম অংশহে পঢ়িব পৰা অৱস্থালৈ আহিছিল। ইয়াৰ ফলত শিক্ষাৰ্থীসকলৰ নম্বৰ, ৰেংক বা শ্ৰেণীবিভাজনৰ ওপৰত কোনো ধৰণৰ প্ৰভাৱ পৰা নাই। জে ই ই এডভান্সড আৰু জোছা কাউঞ্চেলিং প্ৰক্ৰিয়াৰ স্বচ্ছতা আৰু নিৰাপত্তা বজাই ৰাখিবলৈ আই আই টি ৰুৰকী সম্পূৰ্ণৰূপে প্ৰতিশ্ৰুতিবদ্ধ বুলি উল্লেখ কৰে।

আনহাতে, এই কাৰিকৰী ঘটনাটোক কেন্দ্ৰ কৰি ৰাজনৈতিক মহলতো প্ৰতিক্ৰিয়াৰ সৃষ্টি হৈছে। বিৰোধী দল ককৰোচ জনতা পাৰ্টিয়ে এই সমগ্ৰ বিষয়টোক লৈ চৰকাৰক তীব্ৰ আক্ৰমণ কৰিছে আৰু কেন্দ্ৰীয় শিক্ষা মন্ত্ৰী প্ৰধানৰ পদত্যাগৰ দাবী উত্থাপন কৰিছে। এই দাবীত দলটোৱে অহা ৬ জুনত এক প্ৰতিবাদী কাৰ্যসূচীও গ্ৰহণ কৰাৰ কথা ঘোষণা কৰিছে। কিন্তু শিক্ষা মন্ত্ৰালয় আৰু আই আই টি ৰুৰকীয়ে জনসাধাৰণক ছচিয়েল মিডিয়াত প্ৰচাৰিত উৰাবাতৰিৰ ওপৰত বিশ্বাস নকৰিবলৈ আৰু পৰীক্ষা ব্যৱস্থাৰ ওপৰত সম্পূৰ্ণ আস্থা ৰাখিবলৈ আহ্বান জনাইছে। তেওঁলোকে কয় যে পৰীক্ষা ব্যৱস্থাৰ ওপৰত থকা জনসাধাৰণৰ বিশ্বাস ভংগ কৰিবলৈ একাংশই ইচ্ছাকৃতভাৱে এই সৰু কাৰিকৰী কথাটোক ভুলকৈ প্ৰচাৰ কৰিছে।