বোকাখাত মহকুমাৰ ৰজাবাৰীত আৰক্ষীৰ অভিযান, বৃহৎ পৰিমাণৰ চোৰাং ডিজেল জব্দ

এক গোপন সূত্ৰৰ আধাৰত দেওবাৰৰ দিনা বোকাখাতৰ ৰজাবাৰীৰ নুমলীগড় কনিষ্ঠ মহাবিদ্যলয়ৰ সমীপৰ এটা বাসগৃহৰ চৌহদত অভিযান চলাই আৰক্ষীয়ে ২০ টা ড্ৰামত চোৰাংকৈ মজুত কৰি ৰখা প্ৰায় ৫ হেজাৰ লিটাৰ চোৰাং ডিজেল জব্দ কৰে ৷

গোলাঘাটৰ অতিৰিক্ত আৰক্ষী অধীক্ষক অঞ্জন পণ্ডিত, বোকাখাত মহকুমা আৰক্ষী বিষয়া অনিতা হাজৰিকা আৰু ভাৰপ্ৰাপ্ত আৰক্ষী বিষয়া হেমেন দাসৰ নেতৃত্বত চলা এই অভিযানত চোৰাং ডিজেল খিনিৰ লগতে এন এল ০৫ ডি ৭০৯৫ নম্বৰৰ এখন খালি টেংকাৰো জব্দ কৰিছে ৷

ঘটনাস্থলীৰ পৰা অভিযানকাৰী দলে তেলৰ অবৈধ ব্যৱসায়ৰ লগত জড়িত থকাৰ অপৰাধত ৰজাবাৰীৰ পৰমা ওৰফে পৰমানন্দ দাস , জগত দাস আৰু বাগৰিৰ নুৰজামাল আলীক আটক কৰিছে ৷

পৰমানন্দ দাস কৃষি মন্ত্ৰী অতুল বৰাৰ অতি ঘনিষ্ঠ হোৱাৰ উপৰিও অসম গণ পৰিষদ দলৰ এজন সক্ৰিয় কৰ্মকৰ্তা ৷

ঘটনা সন্দৰ্ভত অধিক তথ্যৰ বাবে আৰক্ষীৰ জেৰা আৰম্ভ হৈছে ৷ বোকাখাত এই অবৈধ তেলৰ ব্যৱসায়ৰ সৈতে আৰু বহু নেতা-পালি নেতা জড়িত থকাৰ তথ্য পোহৰলৈ অহাৰ সম্ভাৱনা আছে ৷