আয়ুৰ্বেদিক চিকিৎসকেও কৰিব পাৰিব জটিল অস্ত্ৰোপচাৰ,চৰকাৰৰ সিদ্ধান্তৰ বিৰোধিতা কৰি আন্দোলন ঘোষণা কাৰ?

এইবাৰ চিকিৎসকৰ বিৰুদ্ধে নামি পৰিছে আন একাংশ চিকিৎসক।

শেহতীয়াকৈ কেন্দ্ৰীয় চৰকাৰে স্নাতকোত্তৰ ডিগ্ৰীধাৰী আয়ুৰ্বেদিক চিকিৎসকসকলকো সাধাৰণ অস্ত্ৰোপচাৰৰ লগতে জটিল অস্ত্ৰোপচাৰো কৰাৰ অনুমতি দিয়াৰ পিছতে জাঙুৰ খাই উঠিছে আন একাংশ চিকিৎসক।

কেন্দ্ৰীয় চৰকাৰৰ এনে সিদ্ধান্ত কোনো পধ্যে মানি লবলৈ সন্মত নহয় ইণ্ডিয়ান মেডিকেল এছোচিয়েচন (IMA)।

আয়ুৰ্বেদিক চিকিৎসকক জটিল অস্ত্োৰপচাৰ কৰাৰ অনুমতি দিয়াৰ বিৰুদ্ধে সেয়ে IMA-এই অহা ১১ ডিচেম্বৰত ঘোষণা কৰিছে দেশ জোৰা ধৰ্মঘটৰ কাৰ্যসূচী।

সেইমৰ্মে ১১ ডিচেম্বৰৰ পুৱা ৬ বজাৰ পৰা সন্ধিয়া ৬ বজালৈ IMA-এই ১২ ঘণ্টীয়া ধৰ্মঘট কাৰ্যসূচী ৰূপায়ণ কৰিব।

এই সময়ছোৱাত IMA ৰ অধীনষ্ঠ চিকিৎসকসকলে কৰ্মবিৰতি পালন কৰিব।অৱশ্যে জৰুৰী সেৱা আৰু কোভিড চিকিৎসাৰ ক্ষেত্ৰত বন্ধ ৰেহাই দিয়া হৈছে বুলি IMA ৰ এগৰাকী কৰ্মকৰ্তাই প্ৰকাশ কৰিছে।

ICU,ITU,CCU আদিৰ ক্ষেত্ৰত এই ধৰ্মঘট কাৰ্যসূচীৰ কোনো প্ৰভাৱ নপৰিব বুলি IMA ৰ এক বিজ্ঞপ্তিত প্ৰকাশ।

ধৰ্মঘটৰ সময়ত চৰকাৰী তথা বেচৰকাৰী চিকিৎসালয়ৰ সকলো আউটডৰ সেৱা বন্ধ থাকিব।

উক্ত দিনটোত পূৰ্ব নিৰ্ধাৰিত কোনো অস্ত্ৰোপচাৰ কৰাৰ পৰাও চিকিৎসকসকল বিৰত থাকিব বুলি জানিব পৰা গৈছে।