আই এছ এলৰ ছেমি : প্ৰথম অৰ্ধত প্ৰভাৱী খেলেৰে গুৰুত্বপূৰ্ণ অগ্রগতি নৰ্থ-ইষ্ট য়ুনাইটেডৰ

প্ৰথমবাৰৰ বাবে ছেমিত প্ৰৱেশ কৰা নৰ্থ-ইষ্ট য়ুনাইটেডে আজি আই এছ এলৰ ২০১৮-১৯ ছিজনৰ প্ৰথমখন ছেমিৰ প্ৰথম অৰ্ধত শক্তিশালী আৰু শীৰ্ষস্থানৰ দল বাংগালুৰু এফ চিৰ বিৰুদ্ধে অগ্রগতি লাভ কৰি আছে।

ঘৰুৱা খেলপথাৰত প্ৰভাৱী খেলেৰে বিপক্ষক ব্যতিব্যস্ত কৰি ৰখা নৰ্থ-ইষ্ট য়ুনাইটেড কেইবাটাও আক্ৰমণৰ সূচনা কৰে। কেইবাটাও গ’লমুখী শ্বট লয় দলটোৱে।

ইয়াৰ মাজতে খেলৰ ২০ মিনিটত অধিনায়ক তথা নাইজেৰিয়ান তাৰকা অগবেচেই সঠিক সময়ত আগ বঢ়াই দিয়া বল নেটত প্ৰৱেশ কৰায় মেঘালয়ী তাৰকা ৰীডীম ত্লাঙে (Redeem Tlang)।

বল দখলৰ যুঁজতো লীগৰ শীৰ্ষস্থানৰ দলটোতকৈ আগ বাঢ়ি থাকে নৰ্থ-ইষ্ট য়ুনাইটেড। প্ৰথম অৰ্ধত নৰ্থ-ইষ্ট য়ুনাইটেডে ৫৮ শতাংশ বল দখল কৰি শক্তিশালী দলটোক বেকফুটলৈ ঠেলি দিয়ে।

ইপিনে ঘৰুৱা দৰ্শকে ঠাহ খাই পৰা ষ্টেডিয়ামৰ পৰা আজি নৰ্থ-ইষ্ট য়ুনাইটেডে নিৰন্তৰ লাভ কৰে অফুৰন্ত প্ৰেৰণা। বেনাৰ আদি লৈ দৰ্শকে দলটোক সঁহাৰি দি যায়।

প্ৰথম অৰ্ধত দুয়োটা দলেই এটাকৈ কৰ্নাৰ কিক পায় যদিও কোনোটোৱে তাক গ’লত পৰিণত কৰিব নোৱাৰিলে।