মোদী মন্ত্ৰীসভাৰ ৪২শতাংশ মন্ত্ৰীৰ বিৰুদ্ধে আছে ফৌজদাৰী গোচৰ; নৱ নিযুক্ত মন্ত্ৰীৰ ৯০ শতাংশ কোটিপতি

নৰেন্দ্ৰ মোদী নেতৃত্বাধীন চৰকাখনৰ ৭৮গৰাকী মন্ত্ৰীৰ ভিতৰত ৪২ শতাংশ মন্ত্ৰীৰ বিৰুদ্ধে আছে ফৌজদাৰী গোচৰ।

এছ’চিয়েশ্যন ফৰ ডেম’ক্ৰেটিক ৰিফৰ্মছ (এ ডি আৰ)ৰ প্ৰতিবেদনত পোহৰলৈ আহিছে এই তথ্য।

এডিআৰে নিৰ্বাচনী শপতনামাৰ উদ্ধৃতিৰে প্ৰকাশ কৰা মতে ৩৩গৰাকী অৰ্থাৎ ৪২শতাংশই তেওঁলোকৰ বিৰুদ্ধে ফৌজদাৰী গোচৰ থকা বুলি জনাইছে।

বুধবাৰে মোদী মন্ত্ৰীসভাত নতুনকৈ ১৫গৰাকী কেবিনেট মন্ত্ৰী আৰু ২৮গৰাকী ৰাজ্যমন্ত্ৰীয়ে শপত গ্ৰহণ কৰিছিল।

মন্ত্ৰীসকলৰ ভিতৰত ২৪ গৰাকী (৩১শতাংশ) মন্ত্ৰীৰ বিৰুদ্ধে হত্যা, হত্যাৰ চেষ্টা, ডকাইতিকে ধৰি গুৰুতৰ ফৌজদাৰী গোচৰ থকা বুলি তেওঁলোকে জনাইছে।

গৃহ মন্ত্ৰ্যালয়ৰ নতুন ৰাজ্যমন্ত্ৰী নিশীথ প্ৰামাণিকে তেওঁৰ বিৰুদ্ধে ভাৰতীয় দণ্ডবিধিৰ ৩০২ধাৰাত হত্যা সম্বন্ধীয় এটি গোচৰ থকাৰ কথা জানিবলৈ দিছে। ৩৫বছৰীয়া নিশীথ এইবাৰ আটাইতকৈ কনিষ্ঠ মন্ত্ৰী।

নিশীথ প্ৰামাণিককে ধৰি মুঠ চাৰিগৰাকী মন্ত্ৰীৰ বিৰুদ্ধে ভাৰতীয় দণ্ডবিধিৰ ৩০৭ধাৰাত হত্যাৰ চেষ্টাৰ গোচৰো আছে। নিশীথৰ বাহিৰে বাকী কেইগৰাকী হ’ল জন বাবলা, পংকজ চৌধুৰী আৰু ভি মুৰলীধৰণ।

আনহাতে, নৱ নিযুক্ত মন্ত্ৰীসকলৰ ভিতৰত ৭০গৰাকী অৰ্থাৎ ৯০ শতাংশ মন্ত্ৰী কোটিপতি। তেওঁলোকৰ গড় সম্পত্তিৰ পৰিমান ১৬.২৪কোটি টকা।

ইয়াৰ ভিতৰত চাৰিগৰাকী মন্ত্ৰী জ্যোতিৰাদিত্য সিন্ধিয়া, পীযুষ গোৱেল, নাৰায়ন তাতুৰেণ আৰু ৰাজীৱ চন্দ্ৰশেখৰে ৫০কোটিতকৈয়ো অধিক সম্পত্তিৰ পৰিমানৰ কথা ঘোষণা কৰিছে।