অৰুণাচল সীমান্তত চীনা সৈন্যৰ সৈতে পুনৰ সংঘৰ্ষ: আহত কেইবাগৰাকীও

বিগত সময়চোৱাত চীন সীমান্তত চেগা-ছোৰোকাকৈ কেইবাবাৰো সংঘৰ্ষত লিপ্ত হৈছে ভাৰতীয় সেনা। শেহতীয়াকৈ পুনৰ যোৱা শুকুৰবাৰে অৰুণাচল প্ৰদেশৰ চীন সীমান্তত ভাৰতীয় আৰু চীনা সৈন্যৰ মাজত আন এক সংঘৰ্ষৰ সূত্ৰপাত হোৱা বুলি প্ৰকাশ কৰিছে এক চৰকাৰী সূত্ৰই।

৯ ডিচেম্বৰত সংঘটিত এই সংঘৰ্ষত দুয়ো পক্ষৰে কেইবাগৰাকীও জোৱান আঘাতপ্ৰাপ্ত হোৱা বুলি জানিব পৰা গৈছে। অৰুণাচল প্ৰদেশৰ টাৱাং চেক্টৰত এই সংঘৰ্ষৰ সূত্ৰপাত হৈছিল চৰকাৰী সূত্ৰটোৱে লগতে সদৰী কৰিছে।

সূত্ৰ অনুসৰি, ৩০০ তকৈও অধিক চীনা সৈন্যই এল.এ.চি. অতিক্ৰম কৰাৰ পিছতে ভাৰতীয় সৈন্যই প্ৰত্যাক্ৰমণ চলায়। সংঘৰ্ষত আহত প্ৰায় ছয়গৰাকী সৈনিকক চিকিৎসাৰ বাবে লগে লগে গুৱাহাটীলৈ লৈ অনা হয় বুলি প্ৰতিৰক্ষা সূত্ৰটোৱে লগতে কয়।

প্ৰকাশিত খবৰ অনুসৰি, সংঘৰ্ষৰ পাছতে অঞ্চলটোত ভাৰতীয় সেনাৰ কমাণ্ডাৰে চীনা সৈন্য বিষয়াৰ সৈতে অঞ্চলটোত পুনৰ শান্তি স্থাপনৰ বাবে সংগঠিত প্ৰণালী অনুসৰি আলোচনাৰ বাবে এক বৈঠক অনুষ্ঠিত কৰে।

ইফালে টাৱাঙৰ এই সংঘৰ্ষ সন্দৰ্ভত বাতৰি প্ৰকাশৰ পাছতে প্ৰতিক্ৰিয়া ব্যক্ত কৰি কংগ্ৰেছে কেন্দ্ৰৰ পৰা কঠোৰ ব্যৱস্থা গ্ৰহণৰ দাবী জনায়।

“অৰুণাচল প্ৰদেশৰ টাৱাং চেক্টৰত ভাৰত আৰু চীনৰ সৈনিকৰ মাজত সংঘৰ্ষ হোৱাৰ খবৰ পোৱা গৈছে। চৰকাৰে দোদুল্যমান মনোভাৱ এৰি চীনৰ কাৰ্য সহ্য কৰা নহ’ব বুলি কঠোৰ সুৰত সকীয়াই দিয়াৰ সময় আহি পৰিছে।”— কংগ্ৰেছে কয়।

अरुणाचल प्रदेश के तवांग सेक्टर में भारत-चीन के सैनिकों के बीच झड़प की खबर है।

वक्त आ गया है कि सरकार ढुलमुल रवैया छोड़कर सख्त लहजे में चीन को समझाए कि उसकी यह हरकत बर्दाश्त नहीं की जाएगी।

— Congress (@INCIndia) December 12, 2022