নেপালৰ নতুন বিতৰ্কিত মানচিত্ৰক লৈ অসন্তুষ্ট ভাৰতে নিজৰ প্ৰতিক্ৰিয়াত কি ক’লে?

নেপালৰ নিম্ন সদনে বিতৰ্কিত মানচিত্ৰ সংশোধনী বিধেয়ক গৃহীত কৰিলে। বিতৰ্কিত মানচিত্ৰখনত ভাৰতৰ লিপুলেখ, কালাপানী আৰু লিংপিয়াধুৰাক অন্তৰ্ভুক্ত কৰিছে।

এতিয়া উচ্চ সদনত গৃহীত হৈ ৰাষ্ট্ৰপতিৰ অনুমোদন লাভ কৰাৰ পাছতে বিধেয়কখনে আইনৰ ৰূপ পাব।

নেপালৰ এই কাৰ্যৰ সন্দৰ্ভত ভাৰত চৰকাৰে কয় যে নেপাল চৰকাৰে নিম্ন সদনত এই সাংবিধানিক সংশোধন বিধেয়ক গৃহীত কৰি সীমা বিষয়টোৰ ৰাজনীতিকৰণ কৰিছে।

নেপাল চৰকাৰে বিষয়টো আলোচনাৰ মাজেৰে সমাধান কৰাৰ ক্ষেত্ৰত সামান্যও গুৰুত্ব নেদেখুৱাৰ অভিযোগ কৰিছে ভাৰতে।

দেশখনে সাধাৰণ ৰাজনৈতিক এজেণ্ডা সন্মুখত ৰাখি এনে অদূৰদৰ্শী পদক্ষেপ গ্ৰহণ কৰা বুলিও প্ৰতিক্ৰিয়া প্ৰকাশ কৰিছে ভাৰতে।

চৰকাৰী সূত্ৰই প্ৰকাশ কৰে যে নেপাল চৰকাৰে সাংবিধানিক সংশোধন গৃহীত কৰাৰ ক্ষেত্ৰত অধিক তৎপৰতা দেখুৱালে।

নেপালৰ হাতত তেওঁলোকৰ দাবীৰ সপক্ষে কোনো সবল ঐতিহাসিক তথ্য প্ৰমান নাই বুলিও দোহাৰে ভাৰতে।

বিদেশ মন্ত্ৰ্যালয়ে নেপালৰ সংসদৰ ঘটনাক্ৰমৰ ওপৰত প্ৰতিক্ৰিয়া প্ৰকাশ কৰি কয়,’’এই কৃত্ৰিম সম্প্ৰসাৰণ প্ৰমান বা ঐতিহাসিক তথ্যৰ ওপৰত আধাৰিত নহয়। ইয়াক কোনো প্ৰকাৰে মানি ল’ব নোৱাৰি। দীৰ্ঘদিন ধৰি সীমা সমস্যাটোৰ আলোচনাৰ মাজেৰে সমাধান সূত্ৰ উলিওৱাৰ আমাৰ বুজাবুজিকো উংলঘা কৰা হৈছে।‘’

উল্লেখ্য যে ভাৰতৰ প্ৰতিৰক্ষা মন্ত্ৰীয়ে লিপুলেখলৈকে এটা ৰাস্তা উদ্বোধন কৰাৰ পাছতে প্ৰতিক্ৰিয়াৰ সৃষ্টি হৈছিল আৰু নেপালে ইয়াক তেওঁলোকৰ ভূমি বুলি দাবী কৰিছিল। ,

আনহাতে, ভাৰতেও ইয়াৰ বিৰোধিতাৰে এয়া ভাৰতৰ অংশ বুলি কাঠমাণ্ডুক সোঁৱৰাই দিছিল।