বিগত ২৪ঘন্টাত দেশত কৰ’নাত আক্ৰান্ত ২লাখ ৫৯হাজাৰ; মাৰাত্মক ভাইৰাছত মৃত্যু ১৭৬১জনৰ

যোৱা ৫ এপ্ৰিলত প্ৰথমবাৰৰ বাবে ভাৰতত দৈনিক সংক্ৰমণৰ সংখ্যা ১লাখৰ সীম অতিক্ৰম কৰিছিল। কিন্তু এসপ্তাহৰ ভিতৰতে এই সংখ্যা ২লাখ অতিক্ৰম কৰি যায়।

সোমবাৰে স্বাস্থ্য মন্ত্ৰ্যালয়ে কৰ’না আক্ৰান্তৰ সংখ্যা ২লাখ ৭৩হাজাৰৰো অধিক হোৱাৰ তথ্য দিছিল। মঙলবাৰে তাৰ তুলনাত সংক্ৰমণ অলপ হ্ৰাস পাইছে। কিন্তু উদ্বেগজনকভাৱে বৃদ্ধি পাইছে মৃত্যুৰ সংখ্যা।

মঙলবাৰে কেন্দ্ৰীয় স্বাস্থ্য মন্ত্ৰ্যালয়ে দাঙি ধৰা তথ্য অনুসৰি, যোৱা ২৪ ঘন্টাত দেশত ২লাখ ৫৯হাজাৰ ১৭০জন লোক কৰ’নাত আক্ৰান্ত হৈছে। ইয়াৰে অধিকাংশই মহাৰাষ্ট্ৰৰ।

মহাৰাষ্ট্ৰৰ উপৰি পঞ্জাৱ, ছত্তীশগড়, কৰ্ণাটক, দিল্লী, উত্তৰ প্ৰদেশৰ দৰে ৰাজ্যসমূহত সংক্ৰমণকলৈ উদ্বিগ্নতা বৃদ্ধি পাইছে। বৰ্তমান দেশত মুঠ কৰ’না আক্ৰান্তৰ সংখ্যা  হৈছে ১কোটি ৫৩লাখ ২১হাজাৰ ৮৯জন।

ইপিনে, যোৱা ২৪ ঘন্টাত মাৰাত্মক ভাইৰাছত ১৭৬১জন লোকে প্ৰাণ হেৰুৱাইছে। দেশত এতিয়ালৈকে ১লাখ ৮০হাজাৰ ৫৩০জন লোকে কৰ’নাত প্ৰাণ হেৰুৱাইছে।

আনহাতে, বৰ্তমান দেশত সক্ৰিয় কোভিড আক্ৰান্ত ৰোগীৰ সংখ্যা হৈছে ২০লাখ ৩১হাজাৰ ৯৭৭জন।

তথ্য অনুসৰি, বিগত ২৪ঘন্টাত দেশত ১লাখ ৫৪হাজাৰ ৭৬১জন লোক কৰ’নাৰ পৰা আৰোগ্য লাভ কৰিছে। এতিয়ালৈকে দেশত কৰ’নাৰ পৰা আৰোগ্য লাভ কৰা লোকৰ সংখ্যা হৈছে ১ কোটি ৩১লাখ ৮হাজাৰ ৫৮২জন।

এতিয়ালৈকে দেশত ১২কোটি ৭১লাখৰ অধিক লোকে কৰ’নাৰ ভেকচিন লাভ কৰিছে। দেশত কৰ’নাৰ সংক্ৰমণ ৰোধ কৰাৰ লক্ষ্যৰে কেন্দ্ৰই ভেকচিন প্ৰদানৰ গতি বৃদ্ধি কৰাৰ সিদ্ধান্ত গ্ৰহণ কৰিছে।