বিমানবন্দৰৰ পৰাই আমেৰিকাই ওভতাই পঠিয়ালে ভাৰতৰ আম! বৃহৎ লোকচানৰ সন্মুখীন ৰপ্তানিকাৰী

পশ্চিমীয়া বিশ্বত ভাৰতৰ সুস্বাদু আমৰ বিপুল চাহিদা থকাৰ পাছতো শেহতীয়াকৈ আমেৰিকাই বিমানবন্দৰৰ পৰাই কোটি কোটি টকাৰ আম ঘূৰাই পঠিয়াইছে। ফলত ৰপ্তানিকাৰীসকলে বৃহৎ লোকচানৰ সন্মুখীন হৈছে।

জানিব পৰা মতে, চলিত মাহত লছ এঞ্জেলছ, ছান ফ্ৰান্সিস্কো, আটলাণ্টাৰ দৰে আমেৰিকাৰ বিভিন্ন বিমানবন্দৰত ভাৰতৰ পৰা কমেও ১৫টা আমৰ চালান বাতিল কৰা হৈছে। ফলত ভাৰতীয় আমৰ ব্যৱসায়ীসকলৰ ভাৰতীয় মুদ্ৰাত প্ৰায় ৪২.৭২ কোটি টকা লোকচান হ’বলৈ গৈ আছে।

সবাতোকৈ ডাঙৰ কথাটো হ’ল তেওঁলোকে দেশলৈ বিপুল পৰিমাণৰ আম ঘূৰাই আনিবলৈ বহু মাচুল ভৰিব লাগিব৷ এই পৰিস্থিতিত ৰপ্তানিকাৰীসকলে আমবোৰ আমেৰিকাতে এৰি থৈ অহাৰ কথা চিন্তা কৰিছে।

প্ৰতিবেদনত উল্লেখ কৰা হৈছে যে যোৱা ৮ আৰু ৯ মে’ত নৱী মুম্বাইৰ এটা নিৰ্দিষ্ট কাৰ্যালয়ত সকলো ৰপ্তানি প্ৰক্ৰিয়া সম্পূৰ্ণ হৈছিল। কিন্তু আমেৰিকাৰ শুল্ক আৰু সীমা সুৰক্ষা বিভাগে ৰপ্তানিৰ নথি-পত্ৰ সঠিক নাছিল বুলি উল্লেখ কৰিছে। সেইবাবেই আমেৰিকাই এই বিপুল পৰিমাণৰ আম ঘূৰাই দিছে।

তেওঁলোকে কয় যে হয় নতুনকৈ ৰপ্তানি প্ৰক্ৰিয়া সম্পূৰ্ণ কৰিব লাগিব নহয় এই যাত্ৰাত বিপুল পৰিমাণৰ আম নষ্ট কৰিব লাগিব। সমগ্ৰ ঘটনাৰ ফলত ক্ষতিগ্ৰস্ত দেশৰ আম ব্যৱসায়ীসকলে অভিযোগ কৰিছে যে সংশ্লিষ্ট বিভাগৰ কাগজ-পত্ৰৰ ভুলৰ বাবেহে তেওঁলোকে ইমান বৃহৎ লোকচানৰ সন্মুখীন হ’বলগীয়া হৈছে।