আমেৰিকাত ভাৰতীয় ছাত্ৰক ছুৰিকাঘাত: সংকটজনক অৱস্থাত চিকিৎসাধীন

আমেৰিকা যুক্তৰাষ্ট্ৰত এক প্ৰাণনাশী আক্ৰমণৰ বলি হৈছে এগৰাকী ভাৰতীয় ছাত্ৰ। যুক্তৰাষ্ট্ৰৰ ইণ্ডিয়ানা প্ৰদেশৰ এটা জিমত দুৰ্বৃত্তই ছুৰীৰে আঘাত কৰে ২৪ বছৰীয়া ভাৰতীয় ছাত্ৰগৰাকীক।

আক্ৰমণৰ বলি হোৱা ছাত্ৰগৰাকীৰ নাম বৰুণ বুলি জানিব পৰা গৈছে। এই ভয়াৱহ আক্ৰমণত গুৰুতৰভাৱে আঘাতপ্ৰাপ্ত বৰুণৰ অৱস্থা সম্প্ৰতি সংকটজনক বুলি বাতৰি প্ৰকাশ পাইছে।

প্ৰকাশিত বাতৰি অনুসৰি, দেওবাৰে পুৱা ইণ্ডিয়ানা চহৰৰ ভালপাৰাইছ’ৰ এটা ৰাজহুৱা জিমত জৰ্ডান এণ্ড্ৰাড নামৰ এজন লোকে ছুৰীৰে আঘাত কৰে বৰুণক।

এনে ভয়াৱহ আক্ৰমণৰ পিছতে আক্ৰমণকাৰী এণ্ড্ৰাডক গ্ৰেপ্তাৰ কৰা হয়। আমেৰিকাৰ স্থানীয় সংবাদ পত্ৰৰ প্ৰতিবেদন মতে, ফ’ৰ্ট ৱেইনৰ এখন চিকিৎসালয়ত চিকিৎসাধীন বৰুণ শূন্যৰ পৰা পাঁচ শতাংশ জীয়াই থকাৰ সম্ভাৱনা আছে বুলি চিকিৎসকে ব্যক্ত কৰিছে।

আক্ৰমণকাৰী এণ্ড্ৰাডৰ ভাষ্য মতে, ঘটনাৰ দিনা তেওঁ মালিচ গ্ৰহণৰ বাবে মালিচ কক্ষত সোমায় আৰু পৰিচিত এগৰাকী ব্যক্তিৰ পৰা মালিচ লোৱাৰ মানস কৰে।

কিন্তু সেই সময়ত উক্ত ব্যক্তিগৰাকী উপস্থিত নাছিল মালিচ কক্ষত। আনহাতে তাত থকা বৰুণৰ আচৰণত অস্বাভাৱিকতা প্ৰত্যক্ষ কৰি এণ্ড্ৰাডে বৰুণৰ পৰা সম্ভাৱ্য ভাবুকিৰ আশংকা কৰে।

এনে আশংকাৰ পৰিণতিতে তেওঁ বৰুণক আক্ৰমণ কৰা বুলি স্বীকাৰ কৰিছে আক্ৰমণকাৰী যুৱকজনে।