মেড-ইন-ইণ্ডিয়া; ৰাজস্থানত টেংক প্ৰতিৰোধী ‘হেলিনা’ মিছাইলৰ সফল পৰীক্ষণ

ভাৰতত থলুৱাভাৱে নিৰ্মিত টেংক প্ৰতিৰোধী ‘হেলিনা’ মিছাইলৰ শুকুৰবাৰে সফলভাৱে পৰীক্ষণ সম্পন্ন কৰা হয়।

ৰাজস্থানত এডভান্স লাইট হেলিকপ্তাৰ ‘ধ্ৰুৱ’ৰ পৰা টেংক প্ৰতিৰোধী মিছাইল বিধৰ পৰীক্ষণ কৰা হয়।

‘হেলিনা’ মিছাইল নিৰ্মাণ কৰা ভাৰতীয় প্ৰতিৰক্ষা গৱেষণা সংস্থা চমুকৈ ডি আৰ ডি অ’ই সফলভাৱে পৰীক্ষণৰ দৃশ্য ছ’চিয়েল মিডিয়াত শ্বেয়াৰ কৰে।

ডি আৰ ডি অ’ই শ্বেয়াৰ কৰা ভিডিঅ’ত হেলিনা মিছাইলক হেলিকপ্তাৰৰ পৰা নিক্ষেপ কৰা দেখা গৈছে।

‘হেলিনা’ মিছাইলৰ সফল পৰীক্ষণৰ পাছতে অতি শীঘ্ৰে ইয়াক ভাৰতীয় সেনা বাহিনী আৰু ভাৰতীয় বায়ু সেনাবাহিনীত অন্তৰ্ভূক্ত কৰা হ’ব বুলি জানিব পৰা গৈছে।

উল্লেখযোগ্য যে, চীনৰ সৈতে বিগত বৰ্ষত সীমান্তত উত্তেজনা বৃদ্ধি পোৱাৰ পাছৰে পৰা ভাৰতে থলুৱাভাৱে নিৰ্মিত প্ৰতিৰক্ষা সামগ্ৰীৰ বিকাশৰ ওপৰত গুৰুত্ব আৰোপ কৰিছে।

প্ৰতিৰক্ষা মন্ত্ৰী ৰাজনাথ সিঙেও বহু সময়ত ভাৰতে প্ৰতিৰক্ষা সামগ্ৰীৰ ক্ষেত্ৰত অন্য ৰাষ্ট্ৰৰ ওপৰত থকা নিৰ্ভৰশীলতা হ্ৰাস কৰিব লাগিব বুলি উল্লেখ কৰি আহিছে।