মিলন অসম্ভৱ; প্ৰেমিক-প্ৰেমিকাই একেলগে কৰিলে বিহ পান, প্ৰেমিকাৰ মৃত্যু

প্ৰেমত দেখা দিয়া বাধাৰ বাবে এক কিশোৰ দম্পতিয়ে বিহ পান কৰি আত্মহত্যাৰ চেষ্টা চলোৱা কাৰ্যই চাঞ্চল্যৰ সৃষ্টি কৰিছে গোৱালপাৰা জিলাত।

জানিব পৰা মতে মেঘালয়ৰ পশ্চিম গাৰো পাহাৰ জিলাৰ টিকৰিকিলাৰ এগৰাকী গাৰো ছোৱালী আৰু গোৱালপাৰা জিলাৰ জলেশ্বৰৰ সমীপৰ ভিমকোচৰ মুছলমান ল’ৰাৰ মাজত আছিল প্ৰেমৰ সম্পৰ্ক।

কিন্তু ল’ৰা আৰু ছোৱালীৰ পৰিয়ালে এই সম্পৰ্কক কোনো পধ্যে মানি নোলোৱাত দুয়োগৰাকীয়ে আত্মহত্যাৰ পথ বাচি লয়। বিহ পান কৰাৰ ফলত ছোৱালী গৰাকীয়ে মৃত্যুক আঁকোৱালি লোৱাৰ লগতে গোৱালাপাৰা অসামৰিক চিকিৎসালয়ত মৃত্যুৰ সৈতে যুঁজি আছে প্ৰেমিক যুৱক।

আৰক্ষীয়ে জনোৱা অনুসৰি দুয়োগৰাকীৰ মাজত যোৱা তিনি বছৰৰ পৰা চলি আছিল প্ৰেমৰ সম্পৰ্ক।

উল্লেখ্য যে ল’ৰাৰ পিতৃ আব্দুল বাৰেক আৰু ছোৱালীৰ পিতৃ বি চাংমা ভাল বন্ধু আছিল। কিন্তু ধৰ্ম বেলেগ বেলেগ হোৱা বাবে তেওঁলোকৰ সন্তানৰ মাজত থকা প্ৰেমৰ সম্পৰ্কক মানি ল’ব পৰা নাছিল।

এই কথাই মানসিকভাৱে আঘাত দিছিল প্ৰেমিক হালক। আৰু সেয়ে যোৱা মঙলবাৰে ল’ৰাজনে ছোৱলীজনীক ঘৰৰ কাষতে সাক্ষাৎ কৰি দুয়ো আত্মহত্যা কৰাৰ সিদ্ধান্ত লয়। এই সিদ্ধান্তৰ পাছতেই দুয়ো কাষৰ পাহাৰ এখনলৈ গৈ একেলগে বিহ পান কৰে।

বিহ পান কৰাৰ পাছতেই ল’ৰাজনে নিজৰ ফোনযোগে জলেশ্বৰ গাইবন্ধা গাঁৱৰ এজন বন্ধুক সকলোবোৰ কথা কয়।

খবৰ পোৱাৰ লগে লগে বন্ধুজনে ৩০ কিলোমিটাৰ নিলগৰ ঘটনাস্থলত উপস্থিত হৈ দুয়োকে জলেশ্বৰ প্ৰাথমিক স্বাস্থ্য কেন্দ্ৰত ভৰ্তি কৰায়।

চিকিৎসাৰ বাবে অনা ছোৱালী গৰাকীৰ ইতিমধ্যে মৃত্যু হোৱা বুলি প্ৰাথমিক স্বাস্থ্য কেন্দ্ৰটোৰ চিকিৎসকে জানিবলৈ দিয়াৰ লগতে ল’ৰাজনক শীঘ্ৰে গোৱালপাৰা অসামৰিক চিকিৎসালয়ত ভৰ্তি কৰাবলৈ নিৰ্দেশ দিয়ে।

ছোৱালী গৰাকীৰ মৃতদেহ ল’ৰাজনৰ ঘৰত ৰখা হৈছিল। ‘বুধবাৰে ৰাতিপুৱা এটা ফোনক’ল পোৱাৰ পাছত আমি আব্দুল বাৰেকৰ ঘৰৰ পৰা ছোৱালী গৰাকীৰ মৃতদেহটো উদ্ধাৰ কৰো’। জলেশ্বৰ আৰক্ষী চকীৰ ভাৰপ্ৰাপ্ত বিষয়া চৰবেছ আলীয়ে জনায়।

ইফালে আৰক্ষীয়ে ছোৱালী গৰাকীৰ মৃতদেহটো মৰণোত্তৰ পৰীক্ষাৰ অন্তত পৰিয়ালৰ লোকক চমজাই দিয়ে বুলি জানিব পৰা গৈছে।

এই ঘটনাই এতিয়া অঞ্চলটোৰ বিভিন্ন ধৰ্মালম্বী লোকসকলৰ মাজত চৰ্চাৰ কেন্দ্ৰ বিন্দু হৈ পৰাৰ লগতে ছোৱালীগৰাকীৰ আত্মাই শান্তি লাভ কৰাৰ লগতে যুৱকজন যাতে শীঘ্ৰে সুস্থ হৈ উঠে তাৰেই কামনা কৰিছে।