ওদালগুৰি জিলাৰ ভাৰত-ভূটান সীমান্তত আটকধুনীয়া তোৰণ মুকলি

ওদালগুৰি জিলাৰ ভাৰত-ভূটান সীমান্তত সোমবাৰে অসম চৰকাৰৰ মন্ত্ৰী ৰিহন দৈমাৰীয়ে এখন সু-উচ্চ তোৰণ আনুষ্ঠানিক ভাৱে মুকলি কৰে।

সীমান্ত উন্নয়ণ পুজিৰ অন্তৰ্গত ৮৩ লাখ টকা ব্যয়সাপেক্ষে আটকধুনীয়া তোৰণখন নিৰ্মাণ কৰি উলিওৱা হয়।

সোমবাৰে ভাৰত-ভূটান আন্তঃৰাষ্ট্ৰীয় সীমান্তত তোৰণখন মুকলি কৰি দৈমাৰীয়ে দুয়োখন দেশৰ মাজত অনাগত দিনত বন্ধুত্বপূৰ্ণ সম্পৰ্ক আৰু অধিক দৃঢ় হ’ব বুলি আশা প্ৰকাশ কৰে।

উল্লেখযোগ্য যে, অসম গৌৰৱ এশিঙীয়া গঁড়, অসমীয়া গামোচা, জাপি আদিৰ লগতে বিভিন্ন জাতি জনগোষ্ঠীৰ ঐতিহ্য বহন কাৰী তোৰণখনে ভূটীয়া লোকসকলৰ সন্মুখত অসমৰ কৃষ্টি-সংস্কৃতিক প্ৰতিফলিত কৰিব।

আনহাতে, ৰিহন দৈমাৰীয়ে ওদালগুৰি জিলাত মুকলি কৰা এই তোৰণখন দেশী-বিদেশী পৰ্যটক সকলৰ বাবেও আকৰ্ষণৰ কেন্দ্ৰ বিন্দু হ’ব বুলি মন্তব্য কৰে।

তোৰণখন উন্মোচন কৰি ইয়াৰ পৰিচৰ্যাৰ দায়িত্ব ভৈৰৱকুণ্ডস্থিত সীমান্ত সুৰক্ষা বাহিনীক আনুষ্ঠানিকভাৱে অৰ্পন কৰে ওদালগুৰি জিলা উপায়ুক্ত প্ৰকাশ ৰঞ্জন ঘৰফলীয়াই।

উদ্বোধনী অনুষ্ঠানত মাজবাট বিধান সভা সমষ্টিৰ বিধায়ক চৰণ বড়ো, বিটিচিৰ অধ্যক্ষ ত্ৰিদীপ দৈমাৰী আদিকে ধৰি ভালেসংখ্যক লোক উপস্থিত থাকে।