উমৰাংচোত উপস্থিত অসম চৰকাৰৰ তদন্তকাৰী দল; এডাল নহয়, দুডাল পাইপ বিস্ফোৰণ হোৱা বুলি নিশ্চিত

ডিমা হাচাও জিলাৰ উমৰাংচোৰ কপিলী জলবিদ্যুত প্ৰকল্পত হোৱা পাইপ বিস্ফোৰণৰ ঘটনাটোৰ তদন্তৰ বাবে আজি অসম চৰকাৰে গঠন কৰি দিয়া তদন্ত সমিতি ঘটনাস্থলীত উপস্থিত হৈছে।

পৰিস্থিতি পৰ্য্যালোচনা কৰিবলৈ পাৰ্বত্য এলেকা উন্নয়ন দপ্তৰৰ মন্ত্ৰী চুম’ ৰংহাঙৰ নেতৃত্বত বিধায়কদ্বয় বি বি হাগজেৰ, ডা: নোমল মমিন, উত্তৰ কাছাৰ পাৰ্বত্য স্বায়ত্ত শাসিত পৰিষদৰ চি ই এম দেবোলাল গাৰ্লোছা আৰু নীপকোৰ স্বতন্ত্ৰ সঞ্চালক বিজয় গুপ্তাও ঘটনাস্থলীত উপস্থিত হয়৷

যোৱা ৭ অক্টোবৰৰ পুৱা ৪ বাজি ৩০ মিনিটত উমৰাংচোৰ কপিলী নদীৰ ওপৰত থকা নীপকোৰ জলবিদ্যুৎ প্ৰকল্পটোৰ পাৱাৰ হাউছলৈ পানী কঢ়িয়াই অনা বৃহৎ পাইপ ফাটি অঞ্চলটোত জলপ্ৰলয়ৰ সৃষ্টি হৈছিল।

ভয়ংকৰ দুৰ্ঘটনাটোত পাৱাৰ হাউছৰ নিম্নাংশৰ দ্বিতীয় মহলাত কৰ্মৰত ৪গৰাকী কৰ্মচাৰী নিমিষতে নিৰুদ্দেশ হৈছিল৷  এতিয়াও গোটেই প্ৰকল্পটো বালিৰ তলত পোত গৈ আছে আৰু কৰ্মচাৰীকেইজন সন্ধানহীন হৈয়ে আছে।

ইফালে নীপকো কৰ্তৃপক্ষই এসপ্তাহে এডাল পাইপহে ফাটি জল বিস্ফোৰণৰ সৃষ্টি হোৱা বুলি কৈছিল যদিও আজি তদন্তকাৰী দলে ড্ৰোন কেমেৰাৰে জলবিস্ফোৰণৰ অংশ পৰীক্ষা কৰাত ধৰা পৰে যে এডাল নহয় দুডাল পাইপেই বিস্ফোৰিত হৈছিল৷

ইয়াৰ আঁৰত কোনো কূটাঘাতকাৰী ভূমিকা আছে নেকি সেই প্ৰশ্ন সন্মুখত লৈ তদন্ত কৰাৰ কথাও উত্থাপন হৈছে। দুডাল পাইপ ফটা কথাটো সহজভাৱে ল’ব পৰা নাই নীপকোৰ স্বতন্ত্ৰ সঞ্চালক বিজয় গুপ্তাই৷ তেওঁ বিষয়টো আৰক্ষী আৰু মেট্ৰ’লজি বিভাগৰ লগত আলোচনা কৰাৰ পিছতহে স্পষ্ট হ’ব বুলি কয়৷

ইপিনে মন্ত্ৰী চুম’ ৰংহাঙে জানিবলৈ দিয়ে, নিৰুদ্দেশ হৈ থকা কৰ্মচাৰী কেইগৰাকীক উদ্ধাৰ অভিযান আজিৰ পৰা পূৰ্ণ গতিত চলিছে৷ “জলবিস্ফোৰণ কিয় হ’ল, ক’ত ত্ৰুটি ৰ’ল, সেয়া পৰৱৰ্তী সময়ত ক’ব পৰা হ’ব” মন্ত্ৰীজনৰ মন্তব্য।