আইপিএল২০২১ : চেন্নাই ছুপাৰ কিংছৰ নতুন জাৰ্চি মুকলি, সেনাবাহিনীলৈ বিশেষ শ্ৰদ্ধা
চলিত বৰ্ষৰ আইপিএলত চি.এছ.কে. চেন্নাই ছুপাৰ কিংছক নতুন জাৰ্চি পৰিধান কৰা দেখা যাব।
দলটোৰ অধিনায়ক মহেন্দ্ৰ সিং ধোনীয়ে বুধবাৰে চিএছকেৰ নতুন জাৰ্চি মুকলি কৰে।
দলৰ ফ্ৰেন্সাইজিয়ে সামাজিক মাধ্যমত শ্বেয়াৰ কৰা এটা ভিডিঅ’টোত দেখা পোৱা গৈছে যে ধোনীয়ে এটা কাৰ্টুন খুলি জাৰ্চিটো তাৰ পৰা মুকলি কৰিছে আৰু অনুৰাগীসকলৰ আগত প্ৰদৰ্শন কৰিছে।
নতুন জাৰ্চিবিধৰ কান্ধত সৈনিকে পৰিধান কৰা সাজৰ দৰে কেম’ফ্লেজ ডিজাইন সন্নিবিষ্ট কৰা হৈছে।
ইয়াৰ দ্বাৰা ভাৰতীয় সেনা বাহিনীৰ প্ৰতি শ্ৰদ্ধা জ্ঞাপন কৰা হৈছে।
ইয়াৰ পূৰ্বে দলটোৰ জাৰ্চিবিধৰ কান্ধত ৰঙা আৰু নীলা ৰঙৰ শাৰী আছিল।
নতুন জাৰ্চিবিধত দলটোৰ স্পনছৰাৰ Myntraৰো প্ৰতীক সন্নিৱিষ্ট কৰা হৈছে।
তদুপৰি জাৰ্চিৰ বাওঁফালে থকা দলটোৰ নিজস্ব প্ৰতীকৰ ওপৰত ৩টাকৈ তৰা সংলগ্ন কৰা হৈছে।
তৰাকেইটাৰে টুৰ্ণামেণ্টখনত দলটোৱে ৩বাৰ বিজয়ী হোৱাক সূচাইছে।
চেন্নাই ছুপাৰ কিংছে ১০ এপ্ৰিলৰ পৰা চলিত বৰ্ষৰ আইপিএলৰ যাত্ৰা আৰম্ভ কৰিব।
প্ৰথম মেচত তেওঁলোকে যোৱা বৰ্ষৰ ৰাণাৰ্ছ-আপ দিল্লী কেপিটেলছৰ বিৰুদ্ধে অংশ ল’ব।