যুদ্ধৰ উকমুকনি! ইৰাক-ছিৰিয়াত মিছাইল আক্ৰমণ ইৰাণৰ, আক্ৰমণ মোছাদৰ কাৰ্যালয়ত

হামাছৰ ইজৰাইল আক্ৰমণ আৰু তাৰ পিছতে গাজাত ইজৰাইলে চলোৱা নৰসংহাৰী-ৰক্তক্ষয়ী যুদ্ধৰ ভয়াৱহতাই গ্ৰাস কৰাৰ সময়তে মধ্য প্ৰাচ্যত উকমুকনি হৈছে আন এক যুদ্ধৰ।

এইবাৰ ছিৰিয়া আৰু ইৰাকৰ স্বায়ত্তশাসিত কুৰ্দিস্তান অঞ্চলত একাধিক স্থানত ক্ষেপণাস্ত্ৰ আক্ৰমণ চলাইছে ইৰাণৰ ৰিভল্যুচনেৰী গাৰ্ডে। ইৰাণৰ আক্ৰমণৰ লক্ষ্য হৈ পৰিছে ইজৰাইলৰ চোৰাংচোৱা সংস্থা মোছাদৰ কাৰ্যালয়ো।

ইৰাণৰ ৰিভল্যুচনেৰী গাৰ্ডে এক বিবৃতিত উল্লেখ কৰা মতে সোমবাৰে নিশাৰ ভাগত ইৰাকস্থিত মোছাদৰ কাৰ্যালয় আৰু ইৰাণ বিৰোধী সন্ত্ৰাসবাদী গোটৰ কেন্দ্ৰ ধ্বংস কৰাৰ উদ্দেশ্যে ক্ষেপণাস্ত্ৰ ব্যৱহাৰ কৰা হৈছে।

ইৰাকৰ কুৰ্দিস্তান নিৰাপত্তা পৰিষদৰ তথ্য অনুসৰি এই আক্ৰমণত ৪ জন লোক নিহত হোৱাৰ লগতে আন ৬ জন আহত হয়।

কুৰ্দিস্তান ডেম’ক্ৰেটিক পাৰ্টিয়ে জানিবলৈ দিয়া মতে, নিহত হোৱা কেইবাজনো সাধাৰণ নাগৰিকৰ ভিতৰত আগশাৰীৰ ব্যৱসায়ী পেশ্বৰ’ ডিজাইও আছিল।

ৰিভল্যুচনেৰী গাৰ্ডে লগতে ছিৰিয়াতো বেলিষ্টিক মিছাইলেৰে আক্ৰমণ কৰে। লক্ষণীয়ভাৱে শেহতীয়াকৈ দক্ষিণৰ কেৰমান আৰু ৰাস্ক চহৰত সন্ত্ৰাসবাদী সংগঠনৰ আক্ৰমণত নিহত হৈছিল কেইগৰাকীমান ইৰাণী লোক।

এই আক্ৰমণৰ প্ৰতিক্ৰিয়া স্বৰূপেই ৰিভল্যুচনেৰী গাৰ্ডে ছিৰিয়াত আক্ৰমণ চলোৱা বুলি স্থানীয় সংবাদ মাধ্যমত প্ৰকাশ পাইছে। ইফালে ইৰাণৰ এই আক্ৰমণক গৰিহণা দিছে আমেৰিকাই।

আমেৰিকাই ইৰাণৰ এই আক্ৰমণক ‘অসাৱধানতাপূৰ্ণ’ আখ্যা দিয়ে।