নিহত ইৰাণৰ সৰ্বোচ্চ নেতা আয়াতুল্লাহ খামেনেই; দাবী ট্ৰাম্প-নেতানিয়াহুৰ, কি ক’লে ইৰানে?

ইৰাণৰ সৰ্বোচ্চ নেতা আয়াতুল্লাহ আলী খামেনেইৰ মৃত্যু ঘটিছে। যৌথ আক্ৰমণৰ পিছতে এই কথা দাবী কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ইয়াৰ পূৰ্বে এই দাবী কৰিছিল। অৱশ্যে ড’নাল্ড ট্ৰাম্পৰ এই বক্তব্যৰ পিছতে বিশ্বজুৰি আলোড়ন উঠিছে। আনহাতে, তেহৰানে সমগ্ৰ বিষয়টোক উৰাবাতৰি বুলি উলাই কৰিছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পে ট্ৰুথ ছ’চিয়েলত এটা পোষ্টযোগে কয় যে ইৰাণৰ সৰ্বোচ্চ নেতা আয়াতুল্লাহ খামেনেইৰ মৃত্যু নিশ্চিত হৈছে। ইজৰাইলৰ সহযোগত চলোৱা এক অতি সুনিৰ্দিষ্ট অভিযানৰ বাবে খামেনেই আৰু তেওঁৰ লগত থকা আন নেতাসকল সাৰি যাব পৰা নাছিল বুলি ট্ৰাম্পে দাবী কৰে। ইয়াৰ উপৰিও আমেৰিকাৰ ৰাষ্ট্ৰপতিয়ে কয় যে এই সামৰিক অভিযানে ইৰাণৰ প্ৰতিৰক্ষা ব্যৱস্থাৰ ব্যাপক ক্ষতিসাধন কৰে।

তেওঁৰ পোষ্টত আমেৰিকাৰ ৰাষ্ট্ৰপতিগৰাকীয়ে দাবী কৰে যে আয়াতুল্লাহ খামেনেই ইতিহাসৰ অন্যতম নিষ্ঠুৰ ব্যক্তি। ইৰাণৰ জনসাধাৰণক ৰাজপথলৈ ওলাই আহি নিজৰ দেশ ঘূৰাই ল’বলৈও আহ্বান জনায়।

ট্ৰাম্পে কয় যে তেওঁৰ চূড়ান্ত লক্ষ্য হৈছে মধ্যপ্ৰাচ্য আৰু বিশ্বত শান্তি প্ৰতিষ্ঠা কৰা। তেওঁৰ মতে ইতিমধ্যে ইৰাণৰ অত্যাচাৰী শাসন ব্যৱস্থা ধ্বংস কৰি এই প্ৰক্ৰিয়া আৰম্ভ হৈছে। এতিয়া তাৰ জনসাধাৰণে নিজৰ ভৱিষ্যত নিজেই নিৰ্ধাৰণ কৰিব পাৰিব।

আনহাতে, ট্ৰাম্পৰ বক্তব্যৰ পূৰ্বে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ভিডিঅ’ বাৰ্তাযোগে কয় যে, “আজি পুৱা আমি একনায়কত্ববাদী খামেনেইৰ অট্টালিকাটো ধ্বংস কৰিলোঁ… এই নিষ্ঠুৰ শাসকজন আৰু জীয়াই নাই বুলি বহু ইংগিত পোৱা গৈছে।”

অৱশ্যে ইৰাণৰ বৈদেশিক মন্ত্ৰী আব্বাছ আৰাঘচিয়ে ইয়াৰ পূৰ্বে কৈছিল যে, “মই জনাত খামেনেই আৰু ৰাষ্ট্ৰপতি দুয়োজনেই জীৱিত আছে।” ইৰাণৰ চৰকাৰী সংবাদ মাধ্যমে এই মৃত্যুৰ খবৰক ‘মনোবৈজ্ঞানিক যুদ্ধ’ বা যুদ্ধৰ কৌশল বুলি উৰুৱাই দিছে।

উল্লেখ্য যে ইজৰাইল আৰু আমেৰিকাই শনিবাৰে সমগ্ৰ ইৰাণত আক্ৰমণ চলাইছিল। বিভিন্ন সংবাদ মাধ্যমে দাবী কৰিছে যে এই যৌথ আক্ৰমণত প্ৰায় ২০০ জন লোক নিহত হৈছে। আহত হৈছে কমেও ৭৫০ জন। ইৰাণৰ ৰেড ক্ৰীচেণ্টৰ উদ্ধৃতি দি ৰয়টাৰে এই তথ্য প্ৰকাশ কৰিছে। ইজৰাইলে জনোৱা মতে, সেই সময়ত কমেও ৫০০ স্থানত ২০০ খন জেট বিমানেৰে আক্ৰমণ কৰা হৈছিল।