যোগান ধৰিছিল গোপন তথ্য! আমেৰিকা-ইজৰাইলৰ আৰু ৯৭জন চোৰাংচোৱাক গ্ৰেপ্তাৰ কৰিলে ইৰাণে
ইৰাণৰ চোৰাংচোৱা মন্ত্ৰালয়ে জনোৱা মতে, আমেৰিকা আৰু ইজৰাইলৰ বাবে কাম কৰাৰ অভিযোগত কৰ্তৃপক্ষই আৰু ৯৭ জন লোকক গ্ৰেপ্তাৰ কৰিছে। ইয়াৰে ১৩জনক দক্ষিণ-পূব ইৰাণত গ্ৰেপ্তাৰ কৰা হৈছে।
ইৰাণৰ সম্প্ৰচাৰক আই আৰ আই বিয়ে শ্বেয়াৰ কৰা এক বিবৃতিত মন্ত্ৰালয়ে কয় যে আটকাধীনসকলে সমগ্ৰ দেশতে অশান্তিৰ সৃষ্টি আৰু হত্যাকাণ্ড সংঘটিত কৰাৰ পৰিকল্পনা কৰিছিল।
ইৰাকৰ সীমান্তৰ সমীপৰ দক্ষিণ-পশ্চিম ইৰাণৰ পাঁচটা সশস্ত্ৰ ভাড়াতীয়া চক্ৰকো উৎখাত কৰি পেলোৱাৰ দাবী কৰে মন্ত্ৰালয়ে।
ইয়াৰ পূৰ্বে উত্তৰ আলবোৰ্জ প্ৰদেশত ইৰাণৰ কৰ্তৃপক্ষই শত্ৰুতাপূৰ্ণ নেটৱৰ্কলৈ যুদ্ধৰ ফুটেজ প্ৰেৰণ কৰাৰ অভিযোগত ৪১ জন লোকক গ্ৰেপ্তাৰ কৰা বুলি প্ৰকাশ পাইছিল।
ইপিনে, ইৰাণৰ অৰ্ধসামৰিক ৰিভল্যুচনেৰী গাৰ্ডে জনোৱা মতে, যুদ্ধ আৰম্ভ হোৱাৰ পৰাই আমেৰিকা আৰু ইজৰাইলৰ হৈ কাম কৰা ১৭৮জন চোৰাংচোৱাক গ্ৰেপ্তাৰ কৰা হৈছে। ইৰাণৰ মেহৰ নিউজ এজেন্সীয়ে এই তথ্য নিশ্চিত কৰিছে।
আই আৰ জি চিয়ে কয় যে বন্দীসকলে ৰেড ক্ৰীচেণ্ট কেন্দ্ৰ আৰু বিভিন্ন চেকপইণ্টৰ ফটো আৰু স্থানসমূহ আমেৰিকা আৰু ইজৰাইলৰ চোৰাংচোৱা সংস্থালৈ প্ৰেৰণ কৰিছিল যাতে তেওঁলোকে সেই স্থানসমূহক লক্ষ্য কৰি ল’ব পাৰে।
বন্দীসকলৰ ভিতৰত কেইবাজনো বিদেশী নাগৰিকো আছিল। তেওঁলোকৰ পৰা অস্ত্ৰ-শস্ত্ৰ, স্থান চিনাক্তকৰণ যন্ত্ৰ, বিশেষ যোগাযোগ সঁজুলি আৰু বিদেশী মুদ্ৰা জব্দ কৰা হৈছে।