পৰিয়ালৰ সুৰক্ষাৰ কথা ভাৱি কৰ’নাৰ আশংকাত এচিড পান কৰি আত্মহত্যা IRS বিষয়াৰ!

কৰ’নাৰ আতংকই মানুহৰ জীৱনলৈ বিভিন্ন ধৰণে বিপৰ্যয় নমাই অনাৰ খৱৰ নিতৌ প্ৰকাশ পাবলৈ লৈছে।

দিল্লীৰ দ্বাৰকাত এগৰাকী ৫৬বছৰীয়া আই আৰ এছ বিষয়াই এচিড পান কৰি আত্মহত্যা কৰাৰ বাতৰি পোৱা গৈছে।

গাড়ীত বিষয়াগৰাকীৰ মৃতদেহ উদ্ধাৰ হোৱাৰ পাছত তেওঁক দীনদয়াল উপাধ্যায় হাস্পাতললৈ লৈ যোৱা হয় আৰু চিকিৎসকে তেওঁক মৃত ঘোষণা কৰে।

আই আৰ এছ বিষয়াগৰাকীৰ নাম শিৱৰাজ সিং বুলি জানিব পৰা গৈছে।

সূত্ৰসমূহৰ মতে, মৃত সিঙৰ এটি আত্মহত্যাৰ টোকা পোৱা গৈছে য’ত কৰ’না আশংকাত আত্মহত্যাৰ কথা কোৱা হৈছে।

বাতৰি অনুসৰি, শনিবাৰে সন্ধিয়া ৬বজাত দিল্লী আৰক্ষীক হাস্পাতলৰ পৰা ফোন কৰি এগৰাকী লোকৰ মৃত্যু হোৱাৰ কথা জনোৱা হয়।

আৰক্ষীয়ে ততাতয়াকৈ হাস্পাতললৈ গৈ অনুসন্ধান কৰি জানিব পাৰে যে শিৱৰাজ সিং নামৰ লোকজন ২০০৬বৰ্ষৰ এগৰাকী আই আৰ এছ বিষয়া আছিল।

আৰক্ষীৰ সূত্ৰই জানিবলৈ দিয়া মতে, প্ৰাথমিক তদন্তত এচিড পান কৰাৰ ফলত শিৱৰাজ সিঙৰ মৃত্যু হৈছে।

অৱশ্যে, এইক্ষেত্ৰত আৰক্ষীয়ে মৰণোত্তৰ পৰীক্ষাৰ প্ৰতিবেদনলৈ অপেক্ষা কৰিছে।

তদন্তত জানিব পৰা মতে, দ্বাৰকাৰ ছেক্টৰ-৬ত নিজৰ এপাৰ্টমেন্টৰ বাহিৰত নিজৰ কাৰত শিৱৰাজ সিঙে বিহি আছিল আৰু তাতেই তেওঁ এচিড পান কৰিছিল।

বাতৰি অনুসৰি, শিৱৰাজ সিঙৰ প্ৰায় এসপ্তাহ পূৰ্বে কৰ’নাৰ টেষ্ট কৰা হৈছিল আৰু ফলাফল নিগেটিভ আহিছিল।

তথাপি শিৱৰাজ সিং বহুত উদ্বিগ্ন হৈ আছিল আৰু তেওঁ চিন্তা কৰিছিল যাতে তেওঁ আক্ৰান্ত নহয় আৰু তেওঁৰ পৰা যাতে পৰিয়াললৈ সংক্ৰমণ নঘটে।

অৱশ্যে, সম্পূৰ্ণ তদন্তৰ পাছতহে আই আৰ এছ বিষয়াগৰাকীৰ মৃত্যুৰ প্ৰকৃত কাৰণ জানিব পৰা হ’ব বুলি আৰক্ষী সূত্ৰই জানিবলৈ দিয়ে।