ফাইনেলৰ পূৰ্বে হেৰুৱাইছিল জ্যেষ্ঠ ভগ্নীক; শোক চম্ভালি ভাৰতক বিশ্বকাপ জয়ী কৰাই নায়ক ঈশান

দেওবাৰে নিউজিলেণ্ডক চকুৰে সৰিয়হ ফুল দেখুৱাই ভাৰত টি-২০ বিশ্বকাপৰ চেম্পিয়ন হয়। এই জয়ত সঞ্জু চেমচন আৰু যশপ্ৰীত বুমৰাহে যিমানেই ভূমিকা লৈছিল; ঈশান কিষানৰো সিমানেই ডাঙৰ অৱদান আছিল। বেটেৰে ২৫টা বলত ৫৪ ৰানৰ বিস্ফোৰক ইনিংছ খেলিছিল। তেওঁ তিনিটা কেচ লৈ খেলখনৰ গতি ঘূৰাই আনিছিল।

দীৰ্ঘদিন এলাগী হৈ থকাৰ পিছত বিশ্বকাপৰ পূৰ্বে পুনৰ জাতীয় দললৈ উভতি আহে ঈশান। এইবাৰ ট্ৰফীও জিকিলে। আৰু খেলৰ শেষত তেওঁ এই জয় প্ৰয়াত ভিনিহিয়েকক উৎসৰ্গা কৰে। ফাইনেলত প্ৰৱেশ কৰাৰ ৪৮ ঘন্টা পূৰ্বে গাড়ী দুৰ্ঘটনাত প্ৰাণ হেৰুৱাইছিল। নায়ক ঈশানে সেই দুখৰ সৈতে মোকাবিলা কৰি নিজৰ কৰ্তব্য পালন কৰিলে।

এই ঘটনাৰ বাবেই ঈশানৰ পিতৃ প্ৰণৱ পাণ্ডে আহমেদাবাদলৈ আহি খেল চাব পৰা নাছিল। এই ঘটনাৰ পিছত ঈশানেও নিজৰ পৰিয়ালক সংগ দিব বিচাৰিছিল। কিন্তু বিশ্বকাপৰ এই দায়িত্বৰ বাবে তেওঁ দল এৰিব নোৱাৰিলে। এক সাক্ষাৎকাৰত ঈশানৰ পিতৃয়ে কয়, “এটা অতি বেয়া ঘটনা ঘটি গৈছে। আমি বিপদত পৰিছো। সকলোৱে স্তম্ভিত। ঈশানে আমাক লগ কৰিব বিচাৰিছিল। কিন্তু তেওঁ বিশ্বকাপৰ বাবে আহিব পৰা নাছিল। তেওঁ বহুত ভাঙি পৰিছে।”

একাধিক খবৰ অনুসৰি এই ঘটনাৰ পিছত শুকুৰবাৰে ভাৰতৰ অনুশীলনৰ সময়ত হতাশ হৈ পৰিছিল ঈশান। তেওঁ আন দিনৰ দৰে বেছি দিন বেটিং কৰা নাছিল। ভাৰতীয় দলৰ বহুতেই ঈশানৰ কাষলৈ আহিছিল। কিন্তু শেষত তেওঁ নিজৰ ব্যক্তিগত আঘাত আৰু শোক অতিক্ৰম কৰি ফাইনেলত ভাৰতৰ হৈ জিলিকি উঠিল।

মেচৰ পিছত এই বিষয়ে মুকলিকৈ ক’লে ঈশানে। তেওঁ কয়, “শুকুৰবাৰে মোৰ বাইদেউৰ গাড়ী দুৰ্ঘটনাত মৃত্যু হয়। আজি মই তাইৰ কথা ভাবি ভাল খেলিলোঁ। মেচত নমাৰাৰ আগতে মই হাৰ্দিক ভাইৰ সৈতে কথা পাতিলোঁ। তেওঁ মোক দলটোক প্ৰথম স্থান দিবলৈ কৈছিল। গতিকে মই এই জয় মোৰ বাইদেউৰ বাবে উৎসৰ্গা কৰিব বিচাৰো। যিহেতু আজি (দেওবাৰ) আন্তঃৰাষ্ট্ৰীয় মহিলা দিৱস, সেয়ে এই জয় আৰু বিশেষ।”

এই আৱেগিক ঘটনাকলৈ এতিয়া ক্ৰিকেট অনুৰাগীৰ মাজত যথেষ্ট চৰ্চা হৈছে।