আই এছ আইৰ সহায়ত ভাৰতত আক্ৰমণৰ ভয়ংকৰ পৰিকল্পনা! দিল্লীত গ্ৰেপ্তাৰ ৭ সন্ত্ৰাসবাদী, জাৰি কৰা হৈছে হাই এলাৰ্ট

পাকিস্তানৰ চোৰাংচোৱা সংস্থা আই এছ আইৰ সহায়ত ভাৰতত এক বৃহৎ আক্ৰমণৰ পৰিকল্পনা কৰা হৈছিল। কিন্তু দিল্লী আৰক্ষীৰ তৎপৰতাত এই পৰিকল্পনা বিফল হয় আৰু ৭ জন সন্ত্ৰাসবাদীক গ্ৰেপ্তাৰ কৰা হয়। সূত্ৰৰ পৰা জানিব পৰা মতে, ৰাজধানী দিল্লীকে ধৰি দেশৰ কেইবাখনো ঠাইত ধাৰাবাহিক বিস্ফোৰণ ঘটোৱাৰ পৰিকল্পনা কৰিছিল এই সন্ত্ৰাসবাদীসকলে। কেৱল সেয়াই নহয়, গ্ৰেপ্তাৰ হোৱা লোককেইজনৰ সৈতে পাকিস্তানী গেংষ্টাৰ শ্বাহজাদ ভাট্টি আৰু তেওঁৰ সংগী আজমল গুৰ্জৰৰো সম্পৰ্ক থকাৰ কথা পোহৰলৈ আহিছে। এই সমগ্ৰ ঘটনাটোক লৈ ইতিমধ্যে তীব্ৰ চাঞ্চল্যৰ সৃষ্টি হৈছে।

আৰক্ষীয়ে জানিবলৈ দিয়া মতে, এই চক্ৰটোৱে পাকিস্তানৰ চোৰাংচোৱা সংস্থাৰ নিৰ্দেশত সন্ত্ৰাসবাদী আক্ৰমণ, অস্ত্ৰ-শস্ত্ৰ আৰু ড্ৰাগছ সৰবৰাহৰ লগতে দেশৰ চোৰাংচোৱা সংস্থাসমূহৰ গোপন তথ্য চুৰি কৰাৰ দৰে কাম কৰিছিল। প্ৰাথমিকভাৱে জানিব পৰা মতে, তেওঁলোকৰ তত্ত্বাৱধানতে পাকিস্তানৰ পৰা অস্ত্ৰ-শস্ত্ৰ, গোলাবাৰুদ আৰু হেৰোইনৰ দৰে ড্ৰাগছ পঞ্জাবলৈ সৰবৰাহ কৰা হৈছিল। তাৰ পিছত সেইবোৰ দিল্লী আৰু দেশৰ আন আন প্ৰান্তলৈ বিয়পাই দিয়া হৈছিল। শেহতীয়াকৈ চোৰাংচোৱাই গোপন সূত্ৰৰ পৰা এই চক্ৰটোৰ বিষয়ে জানিব পাৰে আৰু তাৰ পিছতেই তেওঁলোকৰ সন্ধানত অভিযান আৰম্ভ হয়। অৱশেষত দিল্লী আৰক্ষীৰ স্পেচিয়েল চেলৰ ইষ্টাৰ্ণ ৰেঞ্জৰ জালত পৰে এই ৭ জন সন্ত্ৰাসবাদী। তেওঁলোকক গ্ৰেপ্তাৰ কৰাৰ পিছতেই সমগ্ৰ ৰাজধানীজুৰি হাই এলাৰ্ট জাৰি কৰা হৈছে। ধৃত লোককেইজনৰ ম’বাইল আৰু ইলেক্ট্ৰনিক সামগ্ৰীৰ পৰা দিল্লীকে ধৰি উত্তৰ ভাৰতৰ কেইবাখনো ৰাজ্যৰ স্পৰ্শকাতৰ স্থানৰ ফটো আৰু তথ্য উদ্ধাৰ কৰা হৈছে।

উল্লেখযোগ্য যে, ইয়াৰ পূৰ্বে দিল্লীৰ পৰা শ্বাহজাদ ভাট্টি মডিউলৰ ৯ টা সন্ত্ৰাসবাদীক আৰক্ষীয়ে গ্ৰেপ্তাৰ কৰিছিল। ৰাজধানীৰ কেইবাখনো ঠাইত আই ই ডি বিস্ফোৰণ ঘটোৱাৰ পৰিকল্পনা কৰিছিল তেওঁলোকে। চোৰাংচোৱা সংস্থাসমূহে সতৰ্ক কৰি দিছিল যে আই ই ডি আক্ৰমণৰ লগতে গাড়ীত বিস্ফোৰণ, আত্মঘাতী আক্ৰমণ বা গুলীচালনা কৰি সাধাৰণ মানুহক হত্যা কৰাৰ পৰিকল্পনাও কৰিছিল সন্ত্ৰাসবাদীয়ে। সেই ঘটনাৰ এমাহ নৌহওঁতেই দিল্লীত পুনৰ সন্ত্ৰাসবাদীৰ এনে কাৰ্যকলাপ পোহৰলৈ অহাত সমগ্ৰ পৰিস্থিতিক লৈ যথেষ্ট উদ্বেগৰ সৃষ্টি হৈছে।