২৩ বছৰীয়া যুৱতীক ধৰ্ষণ : ৯ বছৰৰ কাৰাবাস ব্ৰাজিলৰ তাৰকা ফুটবলাৰ ৰবিনহোৰ
ব্ৰাজিলৰ তাৰকা ফুটবলাৰ ৰবিনহোক এক ধৰ্ষণ কাণ্ডত জড়িত থকাৰ অপৰাধত ৯ বছৰৰ কাৰাদণ্ড বিহিছে ইটালিৰ মিলানৰ আদালতে।
উল্লেখ্য যে ২০১৩ চনৰ এটা ধৰ্ষণ কাণ্ডত জড়িত থকাৰ অভিযোগত ইটালিত ব্ৰাজিলৰ তাৰকা ফুটবলাৰ গৰাকীৰ বিৰুদ্ধে বিচাৰ প্ৰক্ৰিয়া চলি আছিল।
জানিব পৰা মতে ২০১৩ চনত ইটালিৰ বিখ্যাত ক্লাৱ এচি মিলানৰ সৈতে খেলি থকাৰ অৱস্থাত এটা নাইট ক্লাৱত আলবেনীয় বংশোদ্ভূত এগৰাকী ২৩ বছৰীয়া যুৱতীক ধৰ্ষণ কৰিছিল ৰবিনহোৱে।
ঘটনা সংঘটিত কৰাৰ দিনা ৰবিনহোৱে নিজৰ বন্ধুৰ সৈতে উক্ত নাইট ক্লাৱত পাৰ্টি কৰিবলৈ গৈছিল আৰু যুৱতী গৰাকীয়ে সেইদিনাই নিজৰ ২৩ বছৰীয়া বাৰ্থদে’ পাৰ্টি কৰিছিল।
উক্ত পাৰ্টিতে যুৱতী গৰাকীৰ সৈতে ফুটবলাৰ ৰবিনহোৰ পৰিচয় ঘটে আৰু বন্ধুৰ সৈতে যুৱতীগৰাকীক ধৰ্ষণ কৰে বুলি যুৱতী গৰাকীয়ে অভিযোগ দাখিল কৰে।
এই অভিযোগৰ ভিত্তিতে মিলানত ৰবিনহোৰ বিৰুদ্ধে ধৰ্ষণৰ বিচাৰ চলোৱা হয় আৰু ২০১৭ চনত তেওঁক দোষী সাৱস্ত্য কৰে আদালতে।
সেই ৰায়ৰ বিৰুদ্ধে ৰবিনহোৱে আদালাত প্ৰত্যাহ্বান জনায় আবেদন কৰে আৰু আদালতে সেই আবেদন গ্ৰহণ কৰি পুনৰ বিচাৰ প্ৰক্ৰিয়া আৰম্ভ কৰে। অৱশেষত ৰবিনহোক দোষী সাৱস্ত্য কৰি ৯ বছৰৰ কাৰাদণ্ডৰ নিৰ্দেশ দিছে মিলানৰ আদালতে।
ইফালে ৩৬ বছৰীয়া ব্ৰাজিল জাতীয় দলৰ প্ৰাক্তন তাৰকা ফুটবাৰ গৰাকীয়ে বিপদৰ গোন্ধ পায়ে ইটালি এৰি ব্ৰাজিলৰ বিখ্যাত ক্লাৱ ছাণ্টোছৰ সৈতে চুক্তিৱদ্ধ হৈছিল।
ধৰ্ষণ কাণ্ডত জড়িত থকাৰ বাবে ব্ৰাজিলত ৰবিনহোৰ চুক্তি বাতিল কৰিবলৈ ছাণ্টোছৰ বিৰুদ্ধে তীব্ৰ জনমত গঠন হয় আৰু অৱশেষ ছাণ্টোছে ৰবিনহোৰ সৈতে চুক্তি বাতিল কৰে।
উল্লেখ্য যে ৰবিনহোৰ বিৰুদ্ধে ইয়াৰ পূৰ্বেও ধৰ্ষণৰ অভিযোগ উত্থাপন হৈছিল। ইংলেণ্ডৰ বিখ্যাত ক্লাৱ মাঞ্চেটাৰ চিটিৰ হৈ খেলি থাকোতেও এটা নাইট ক্লাৱত এগৰাকী মহিলাক ধৰ্ষণৰ অভিযোগ উত্থাপন হৈছিল যদিও সাক্ষ্য প্ৰমাণৰ অভাৱত সেইবাৰলৈ ৰবিনহোৱে ৰক্ষা পৰিছিল।