মিছা মাতিলে কোনে ? ছিণ্ডিকেটৰ লগত জড়িত জিতু দাস মোৰ ব্যক্তিগত সহায়ক নহয় – স্পষ্টীকৰণ ভবেশ কলিতাৰ 

চুপাৰী চিণ্ডিকেটৰ লগত জড়িত থকাৰ অপৰাধত ডিফু আৰক্ষীয়ে চমন জাৰি কৰা জিতু দাস নিজৰ ব্যক্তিগত সহায়ক নহয় বুলি স্পষ্টীকৰণ দিছে অসম ৰাজ্যিক বিজেপিৰ সভাপতি ভবেশ কলিতাই।

বিভিন্ন সামাজিক মাধ্যমৰ আগত ডিফু আৰক্ষীয়ে চুপাৰী ছিণ্ডিকেট গোচৰত ভবেশ কলিতাৰ ব্যক্তিগত সহায়কক জেৰা কৰা বুলি প্ৰকাশ পোৱাৰ পিছত কলিতাই কয়, ‘‘বিভিন্ন সংবাদ মাধ্যমৰ বাতৰিত দাবী কৰা ধৰণে জিতু নামেৰে মোৰ ব্যক্তিগত সহায়ক নাই আৰু সেই কথা উল্লেখ কৰাৰ আগতে সংবাদ মাধ্যমৰ কৰ্মীসকলে সাৱধান হ’ব লাগিছিল বা জিতু দাস মোৰ ব্যক্তিগত সহায়ক নেকি বুলি সুধিব লাগিছিল। এতিয়ালৈকে মোৰ সমগ্ৰ ৰাজনৈতিক জীৱনত এই নামেৰে মোৰ ব্যক্তিগত সহায়ক নাই।”

অৱশ্যে জিতু দাসৰ ফেচবুক একাউণ্টত বিজেপিৰ মন্ত্ৰী আৰু শীৰ্ষ নেতাৰ সৈতে তেওঁৰ কেইবাখনো ছবি আছে আৰু ইয়াৰে অধিকাংশই ভবেশ কলিতাৰ সৈতে। এই সন্দৰ্ভত ৰাজ্যিক বিজেপিৰ সভাপতিগৰাকীয়ে কয়, ‘আমাৰ দলত কেইবাজনো লোকে যোগদান কৰে আৰু আমি আয়োজন কৰা অনুষ্ঠানসমূহত আমাক সহায় কৰে। তেওঁলোকে আমাক গামোছাৰে সম্ভাষণ জনায় আৰু আমাৰ লগত ফটো ক্লিক কৰে গতিকে তেওঁৰো হয়তো একে ধৰণৰ ফটো থকাটো স্বাভাৱিক।”

ইফালে জিতু দাসৰ এখন ফটো ওলাইছে য’ত দাসৰ পৰিচয় পত্ৰত লিখা আছিল ‘পিএ টু ষ্টেট প্ৰেচিডেন্ট অৱ আসাম’। গতিকে এতিয়া এই ফটোখনে ৰহস্যৰ সৃষ্টি কৰিছে।

উল্লেখ্য যে, গ্ৰেপ্তাৰ হোৱা বিজেপি নেতা লাচিত গগৈয়ে এই গোচৰৰ সৈতে জড়িত বুলি স্বীকাৰ কৰাৰ পিছতে জিতু দাসক ডিফু আৰক্ষীয়ে চমন জাৰি কৰিছিল।