দেশৰ মুখ্য ন্যায়াধীশ হিচাপে শপত গ্ৰহণ কৰিলে ন্যায়াধীশ শাৰদ অৰবিন্দ ব’বডেই

উচ্চতম ন্যায়ালয়ৰ ৪৭তম মুখ্য ন্যায়াধীশ হিচাপে সোমবাৰে শপত গ্ৰহণ কৰিলে ন্যায়াধীশ শাৰদ অৰবিন্দ ব’বডেই।

ৰাষ্ট্ৰপতি ৰামনাথ কোবিন্দে নতুন দিল্লীৰ ৰাষ্ট্ৰপতি ভৱনত তেওঁক শপত বাক্য পাঠ কৰোৱায়। শপতগ্ৰহণ অনুষ্ঠানত প্ৰধান মন্ত্ৰী নৰেন্দ্ৰ মোদী আৰু গৃহ মন্ত্ৰী অমিত শ্বাহো উপস্থিত থাকে।

দেশৰ কেইবাটাও গুৰুত্বপূৰ্ণ গোচৰৰ দায়িত্বত আছিল ন্যায়াধীশ ব’বডে। অযোধ্যা ভূমি বিবাদৰ গোচৰত ৫জনীয়া সদস্যৰ সাংবিধানিক বিচাৰপীঠৰো তেওঁ সদস্য আছিল।

তেওঁ ২০১৭ চনৰ গোপনীয়তা ৰক্ষা সংক্ৰান্তীয় গোচৰৰ বিচাৰৰ দায়িত্বত আছিল। তদুপৰি, প্ৰাক্তন মুখ্য ন্যায়াধীশৰ বিৰুদ্ধে উত্থাপিত যৌন হাৰাশাস্তিৰ অভিযোগত গঠিত কমিটিতো আছিল।

যোৱা ১৮ অক্টোবৰত পৰম্পৰা অনুসৰি পৰৱৰ্তী মুখ্য ন্যায়াধীশ হিচাপে ব’বডেৰ নাম কেন্দ্ৰৰ ওচৰলৈ প্ৰেৰণ কৰিছিল প্ৰাক্তন মুখ্য ন্যায়াধীশ ৰঞ্জন গগৈয়ে। তেওঁ অহা ২০২১ চনৰ ২৩ এপ্ৰিলত অৱসৰ গ্ৰহণ কৰিব।

ন্যায়াধীশ শাৰদ অৰবিন্দ ব’বডে ২০১২ চনত মধ্য প্ৰদেশ উচ্চ ন্যায়ালয়ৰ  মুখ্য ন্যায়াধীশ হিচাপে নিযুক্ত হৈছিল। ইয়াৰ পূৰ্বে তেওঁ ২০০০ চনত বোম্বে হাইকোৰ্টৰ এগৰাকী অতিৰিক্ত ন্যায়াধীশ হিচাপে যোগদান কৰিছিল।

ন্যায়াধীশ ববডে ২০১৩ চনৰ এপ্ৰিলত উচ্চতম ন্যায়ালয়ত যোগদান কৰিছিল।

১৯৫৬ চনৰ ২৪ এপ্ৰিলত মহাৰাষ্ট্ৰৰ নাগপুৰত জন্মগ্ৰহণ কৰা ন্যায়াধীশ ব’বডে নাগপুৰ বিশ্ববিদ্যালয়ৰ পৰা আইন বিষয়ত উচ্চ শিক্ষা গ্ৰহণ কৰিছিল।

দেশৰ মুখ্য ন্যায়াধীশ হিচাপে শপত গ্ৰহণ কৰা ন্যায়াধীশ ব’বডেই প্ৰায় ১৮ মাহৰ কাৰ্যকাল লাভ কৰিব।