বিজেপিৰ কৰ্মীসকলেই এতিয়া নিজৰ দলটোক চিনিব নোৱৰা হৈছে : গৌৰৱ গগৈ
‘বিজেপিৰ কৰ্মীসকলেই এতিয়া নিজৰ দলটোক চিনিব নোৱৰা হৈছে’ এই মন্তব্য কলিয়াবৰ লোকসভা সমষ্টিৰ সাংসদ গৌৰৱ গগৈৰ।
আজি এলানি কাৰ্যসূচীৰে বোকাখাতত উপস্থিত হোৱা সাংসদ গৰাকীক সাংবাদিকে বিজেপিলৈ কংগ্ৰেছৰ পৰা সোঁত বোৱা প্ৰসংগত প্ৰশ্ন কৰাত তেওঁ এনেদৰে কয়।
তেওঁ কয়, ‘এতিয়া বিজেপিৰ কৰ্মীসকলেই নিজৰ দলটোক চিনিব নোৱাৰা হৈছে কিয়নো যাক তেওঁলোকে গালি পাৰিছিল এতিয়া তেওঁলোকেই বিজেপিত সভা শুৱনি কৰি বহি থাকে’।
সাৰদা কেলেংকাৰি, লুইজ বাৰ্জাৰ কেলেংকাৰীৰ লগতে বৰাক উপত্যকাৰ প্ৰসংগ উল্লেখ কৰি তেওঁ কয় যে বিজেপি দল এটা খিচিৰি দল। বিজেপিত এতিয়া অপৰাধীয়ে ভৰি পৰিছে।
তদুপৰি এন আৰ চিক লৈ বিজেপিয়ে ৰাজনীতি কৰা বুলি তেওঁ কয়। তেওঁৰ মতে থলুৱাৰ স্বাৰ্থ সুৰক্ষাৰ বাবে কংগ্ৰেছ চৰকাৰেই এন আৰ চি আনিছিল। কিন্তু ‘বিজেপিৰ ভূলৰ বাবে আজি ৰাষ্ট্ৰীয় নাগৰিক পঞ্জীৰ পৰা থলুৱা লোক বঞ্চিত হ’ল’।
আনহাতে অগপই বিজেপিৰ লগত মিত্ৰতা কৰি নিমাতী কইনাৰ ভাও ধৰিছে বুলি মন্তব্য কৰি তেওঁ কয়, ‘এনেকৈ থকাতকৈ অগপ বিজেপিত চামিল হৈ যোৱাই ভাল’।
সাংসদ গৰাকীয়ে আজি বোকাখাত সমষ্টিৰ উত্তৰ মহুৰা গাঁও পঞ্চায়তৰ বালি চাপৰিৰ সামুহিক গৃহ, বোকাখাত নগৰৰ জ্যেষ্ঠ নাগৰিক সন্মিলনৰ বৃদ্ধ আৱাস, বোকাখাত মইনা পাৰিজাতৰ গৃহ নিৰ্মাণৰ আধাৰশিলা স্থাপন, সাংসদ পুঁজিৰে নিৰ্মাণ কৰা চিকুন আতা থান আৰু কাজিৰঙা হাইস্কুলৰ চৌহদৰ বেৰা আৰু পশ্চিম কাজিৰঙাৰ সামুহিক গৃহ আনুষ্ঠানিকভাৱে উদ্বোধন কৰে।