জাতিধ্বংসী নাগৰিকত্ব বিধেয়কৰ বিৰুদ্ধে শিৱসাগৰত কৰ্মচাৰী পৰিষদৰ প্ৰতিবাদ

নাগৰিকত্ব সংশোধনী বিধেয়ক বাতিলৰ দাবীত আজি সমগ্ৰ অসমতে সদৌ অসম কৰ্মচাৰী পৰিষদে অৱস্থান ধৰ্মঘট কাৰ্যসূচী ৰূপায়ন কৰিছে। এই কাৰ্যসূচীলৈ সঁহাৰি জনাই শিৱসাগৰ জিলা কৰ্মচাৰী পৰিষদেও জিলা উপায়ুক্তৰ কাৰ্যালয়ৰ সন্মুখত দিনৰ ১১ বজাৰ পৰা ২ বজালৈ তিনিঘণ্টীয়া অৱস্থান ধৰ্মঘটৰ কাৰ্যসূচী পালন কৰে।

দিনৰ ১১ বজাৰ লগে লগে জিলাখনৰ সকলো বিভাগৰ শতাধিক কৰ্মচাৰী একত্ৰিত হৈ জিলা উপায়ুক্তৰ কাৰ্যালয়ৰ সন্মুখলৈ আহি এই কাৰ্যসূচী ৰূপায়ন কৰে। ‘দেশত কৈ চাকৰি ডাঙৰ নহয়’, ‘নাগৰিকত্ব সংশোধনী বিধেয়ক বাতিল কৰক’, ‘অসম বিদেশীৰ চৰণীয়া পথাৰ নহয়’, ‘অসম চুক্তিৰ প্ৰতিটো দফা আখৰে আখৰে পালন কৰক’, ‘ধৰ্মৰ ভিত্তিত অসমক ভাগ ভাগ নকৰিব’ আদি প্লেকাৰ্ড হাতে হাতে লৈ তীব্ৰ প্ৰতিবাদ কৰে।

আনহাতে জিলাখনৰ সকলো বিভাগৰ কাৰ্যালয়ত উপস্থিত কৰ্মচাৰী, বিদ্যালয়ৰ শিক্ষক কৰ্মচাৰীসকলে ১১ বজাৰ পৰা ২ বজালৈ সম্পূৰ্ণ কৰ্মবিৰতি পালন কৰে। যাৰ ফলত সম্পূৰ্ণ ৩ ঘন্টাৰ বাবে এক প্ৰকাৰ অচল হৈ পৰে প্ৰশাসন যন্ত্ৰ।

চৰকাৰে যদি নাগৰিকত্ব সংশোধনী বিধেয়ক বাতিল নকৰে ৰাজ্যৰ কৰ্মচাৰী পৰিষদে ইয়াতকৈ অধিক জংগী আন্দোলনৰ কাৰ্যসূচী গ্ৰহণ কৰিব বুলি মন্তব্য কৰে শিৱসাগৰ জিলা কৰ্মচাৰী পৰিষদৰ সভাপতি বিজয় কৃষ্ণ দত্ত আৰু সাধাৰণ সম্পাদক ভাস্কৰ বিশ্বনাথে।